Fersk «bosskai» klar til bruk i Skuteviken

Eldsjel Roger Iversen og domfelte med samfunnstraff restaurerer den svært forfalne kaia på dugnad.

I Skuteviken i Bergen sentrum har eldsjeler gitt eit øydelagt kulturminne nytt liv.

Kaia, som vert omtala som bosskaien, blei bygd på 1200-talet.

I 1875 vart ho bygd om til bosstømming og renovasjonsetaten dumpa boss her fram til 1975.

Formålet med restaureringa var å gjere den tilnærma lik utgåva frå 1875.

– Eit viktig kulturminne

Forbipasserande Tore Thoresen lyser opp når han får auge på Roger Iversen.

Iversen er eldsjela som står bak restaurareringa, og Thoresen fortel at bestefaren hadde båt her før i tida.

Området var tidlegare ei stor fjære, med fleire kaiar som stakk ut.

– Tusen takk for at de restaurerer kaia. Dette er eit viktig kulturminne, seier han til Iversen.

Samarbeid med kriminalomsorga

Iversen har gjort prosjektet på dugnad, ilag med domfelte fra Hordaland Friomsorgskontor. Iversen har samarbeidd med kriminalomsorga i rundt ti år.

Bergen havn står for finansieringa.

– Eg er imot å fengsle folk, som ikkje er ein fare for andre. Dei som jobbar her har gjort mindre brotsverk. Både dei innsette og samfunnet har det betre når dei er i aktivitet, seier Iversen.

Vil ha betre tilgjenge

For Bergen havn er dette eit av fleire prosjekt dei støttar for å gjere hamneområda i byen meir tilgjengeleg.

Eit anna prosjekt er restaureringa av Sukkerhuskaien på Nøstet.

– Kor viktige er desse kaiane i bybiletet?

– Dei er svært viktige kulturminne. Dei har hatt ein sentral funksjon for bergensarar i hundrevis av år. Vi må ta vare på dei få som er att, seier hamnedirektør Johnny Breivik.

Ikkje tilrettelagd for bading

Formålet til bossbrygga er ikkje å vere ein badeplass.

Men det skal kome på plass bord, benkar og permanent grill. Den offisielle opninga kjem etter fellesferien.

– Det står att å få på plass elvesteinar med kjetting, som skal halde bilar ute, seier Iversen.

Etter fellesferien ynskjer han å invitere nabolaget til opningsfest.