Bussjåfør alvorleg skadd etter angrep på Birkelundstoppen

Ein 64 år gammal bussjåfør ligg med alvorlege skader på Haukeland, etter at han vart angripen av ein rusa mann.

Publisert:

AVSPERRA: Kriminalteknikarane Terje Erichsen (t.h.) og Frank Solli (ryggen til) arbeidde søndag formiddag med å sikre spor på Birkelundstoppen. Foto: Eystein Røssum

- Vi har fått opplyst at han verka hardt skadd, men ikkje livstruande. Han blødde kraftig frå andletet og hovudet, seier operasjonsleiar Frode Kolltveit i Vest politidistrikt. Dei fekk meldinga kl. 07.44, og både politi og ambulanse rykte ut til Birkelundstoppen, som er endehaldeplass for linje 2.

Helse Bergen skriv i ei pressemelding kl. 11.20 at mannen er alvorleg skadd. Sjåføren har arbeidd i selskapet i 46 år.

Angripen i kvilebu

Den 64 år gamle sjåføren oppheldt seg i ei lita kvilebu for sjåførane då han vart angripen, ifølgje politiet.

- Han skal ha vore inne i denne bua. Om angrepet skjedde der inne eller utanfor, er førebels litt uklart, seier Kolltveit. Politiet veit ikkje kva våpen som er brukt.

- Det vart først meldt at det var brukt kniv, men dette veit vi ikkje. Det er ikkje funnen nokon kniv førebels, seier Kolltveit.

SPESIALISTAR: Krimteknikarane Terje Erichsen (t.v.) og Frank Solli (i midten) arbeidde søndag formiddag bak sperrebanda for å sikre bevis og dokumentere korleis det såg ut etter angrepet på bussjåføren. Foto: Eystein Røssum

Mistenkte arrestert

Den mistenkte vart arrestert på staden, og er nå på politihuset, etter ein tur innom legevakta. Det skal takast blodprøve av mannen for å finne ut kor rusa han er.

- Han verka rusa. Hittil har det ikkje vore aktuelt å avhøyre mannen ettersom han ikkje er særleg samarbeidsvillig, seier Kolltveit.

Den sikta er i midten av 30-åra og er ein kjenning av politiet.

To kriminalteknikarar blei sendt til haldeplassen på Birkelundstoppen, der det blei sikra spor. Dei samla saman materiale som låg på bakken og fotograferte. Ein hundepatrulje arbeidde også i området.

– FORFERDELEG: Jan Erik Skaar har køyrt buss sidan 1999, og vart sjølv truga på livet for nokre månader sidan. Søndag køyrde han 80-bussen frå den avsperra haldeplassen på Birkelundstoppen. Foto: Eystein Røssum

Det låg mykje blod på asfalten då BT var på staden i 9-tida. Klokka 11 søndag morgon avslutta kriminalteknisk undersøkingane på staden. Haldeplassen er ikkje lenger sperra av, og trafikken går no som normalt.

Det var vitne på ein annan buss som varsla om angrepet, ifølgje Kolltveit.

- Dei blir tatt hand om, og det vil også bli gjort avhøyr. Vitna er prega av hendinga, seier operasjonsleiaren.

Publisert: