Otto og Sølvi fekk kjellaren full av vatn

– Vi har hatt vatn i kjellaren før, men dette er det verste vi har opplevd, seier Sølvi Walle.

Publisert Publisert

BA OM HJELP: Sølvi og Otto Walle innsåg raskt at dei måtte tilkalle brannvesenet. Foto: Paul S. Amundsen

Ekteparet Otto og Sølvi Walle på Os fekk natt til tysdag kjellaren i heimen sin, ein villa frå slutten 1800-talet, full av vatn.

Dei skjønte det ville gå gale rundt klokka 23.00.

– Då tenkte eg: «Faen og», fortel Sølvi Walle.

Ekteparet sette i gong med å forsøkje å pumpe ut vatnet.

– Etter rundt 10 minutt skjønte vi ikkje klarte det sjølv, og ringde brannvesenet. Dei har mykje betre utstyr enn oss, fortel ho og peikar på ei lita pumpe i hjørnet.

REDNINGA: Mannskap frå brannvesenet var raskt på plass i huset. Foto: Paul S. Amundsen

Halvanna meter over golvet

Brannvesenet kom raskt og var på staden etter berre 10 minutt.

– Vi har eit veldig godt brannvesen på Os. Dei kom og gav og god hjelp med ein gong, fortel Otto.

– Kor høgt var vatnet på det høgaste?

– Heilt opp her, fortel Sølvi, og viser med handa rundt ein og ein halv meter over golvet på utsida av veggen til vinterhagen. Heldigvis var det langt mindre som klarte å trenge seg inn i huset.

Rundt 15 centimeter med vatn dekte store deler av kjellaretasjen.

– Baronselva har vi fått i hus før, men aldri så mykje av den, seier Otto.

Klokka 02.00 var brannvesenet framleis i full gong med å pumpe vatn ut av kjellarstova, vaskerommet og garderoben i kjellaren. Nokre av skjortene til Otto hadde fått våte merker etter at elva braut seg inn.

– Det går greitt, seier han.

– Vi fekk no i det minste vaska her, seier Sølvi medan ho skritta hennar lagar små plask gjennom kjellaren.

VÅTT: På det høgaste sto vatnet om lag halvanna meter oppover veggen i kjellaren, fortel ekteparet. Foto: Paul S. Amundsen

Vått treningssenter

I Brugata i Os sentrum har også ei rekke næringslokale fått merke vassmengdene.

Mellom dei hardast ramma er treningssenteret Aktiv 365. Her fossa vatnet inn i lokala utover kvelden og natta. Ei rekke treningsapparat var dekte av vatn.

– Det er heilt utruleg kjipt og kjedeleg, seier Tor Fredrik Neumann-Berg ved treningssenteret.

Han fortel at delar av senteret vart pussa opp for berre tre veker sidan.

– Vi veit ikkje når vi kan opne att, men vi kjem snart tilbake. No skal vi berre få rydda opp her.

Klokka 01.21 natt til tysdag heldt dei framleis på med arbeidet.

STORE VASSMENGDER: Hos Aktiv 365 i Brugata har vatnet trengt seg inn i lokalet. Foto: Paul S. Amundsen

– Huseigar har gjort nokre tiltak her på dagtid, men det ville vore umogeleg å stoppe desse vassmassane. Det er vatn i heile lokalet, sa Neumann-Berg natt til tysdag.

Vatnet sto ved midnatt gjennom heile Brugata i Os sentrum. Baronselva har gått over sine bredder, og ei rekke eigedomar langs Postvegen er ramma, mellom anna Os tannklinikk.

MYKJE VATN: Slik såg det ut inne i treningssenteret. Foto: Ådne Lunde

VÅTT: Os tannklinikk fekk også merke floa. Foto: Paul S. Amundsen

Publisert