– Det blir ikkje ein problemfri avslutning på vinterferien

– Reis på fredag om du ikkje toler kolonne, seier statsmeteorolog Geir Ottar Fagerlid.

Publisert Publisert

På morgonkvisten torsdag låg snøen på bakken i Bergen sentrum, fredag kan det meste forsvinne. Foto: Bård Bøe

Torsdag pregar snø- og byevêr fylkeshovudstaden.

Meteorologisk institutt har sendt ut gult farevarsel for snø.

– Vi ventar 5–15 centimeter snø på 24 timar i ytre Hordaland, seier vakthavande meteorolog Anne Solveig Andersen.

Les også

Vinterferietrafikken direkte

Ifølgje meteorologen vil byevêret gjere det vanskeleg å spå kvar nedbøren kjem.

– Det er venta ein del lokale variasjonar, nokre stadar kan det kome meir enn forventa, seier Andersen.

Torsdagsmorgon lava snøen ned i Bergen sentrum, her utanfor Statens vegvesen. Foto: Bård Bøe

Kollega Geir Ottar Fagerlid seier at snøen derimot møter motbør på fredag.

– Midt på dagen fredag vil det bli opp mot fem grader. Då ventar vi at ein god del av snøen forsvinn, seier Fagerlid.

Blåser opp laurdag

Fredag går vi inn i den siste vinterferie-helga for dei aller fleste i gamle Hordaland.

– Det blir ikkje ein problemfri avslutning på vinterferien, seier Fagerlid.

Helga før vinterferien var det kaos på Haukeli fjellstue grunna sterk vind og nedbør. Laurdag er det igjen farevarsel om fokksnø og vindkast på Vestlandet. Foto: Håkon Aarthun

Fredagen kan også bli den siste godversdagen. Laurdag og søndag er det sendt ut farevarsel for vindkast.

– Det blir vind med nesten storm styrke og i tillegg til litt nedbør frå laurdag av. Fredag ettermiddag til kveld vil vere veldig roleg og fint, konstaterer meteorologen.

Fagerlid seier vêret vil roe seg utover søndagen, eksakt tidspunkt er for tidleg å seie.

– Har du is i magen, kan du vente til søndag kveld med å reise. Då vil det nok roe seg. Om du ikkje orkar tanken på kolonne, bør du nok reise fredag. Det blir nok trøbbel på fjellovergangane.

– Kjennest kaldare enn det er

Sjølv om det søndag teknisk sett er vår, ventar ikkje Fagerlid slutten på vintervêret.

– Tidlegare i vinter hadde vi mykje vind frå vest og sørvest. No kjem den frå søraust, det gjer vinden kaldare, seier Fagerlid.

Meteorologisk institutt har sendt ut gult farevarsel for vindkast langs heile Vestlandet. Foto: Meteorologisk institutt

Meteorologen forklarar at vind frå aust vanlegvis er kaldare enn den som kjem frå vest.

– Vinden kjem frå kontinentet. Sjølv om gradestokken viser pluss, betyr ikkje det at det kjennest slik. Det vil kjennest som det framleis er kaldt i lufta, seier Fagerlid.

Publisert