Her køyrer bilar rett mot raset

– Den eine bilen rygga i full fart. Den andre køyrde rett inn i raset, seier Aud Nilsen Ramsvik.

BT RETTER: BT hadde i en tidligere versjon markert bildet med rød ring for å vise bilene på vei mot raset. Ringene var feil plassert. Bildet er imidlertid tatt idet biler er på vei mot raset. 2. august 2019.

Det styrtregna då Ramsvik tidlegare på ettermidagen køyrde langs Jølstravatnet på E39.

Ho bur i Møre og Romsdal, og er på besøk hos far sin som bur ved Ålhus, rett ovanfor Jølstravatnet, der eitt av rasa gjekk tysdag kveld.

– Eg stod på kjøkkenet og høyrde buldring. Då eg såg ut vindauget såg eg ei enorm sky i fjellsida som vart breiare og breiare.

Klokka var 20.45 då ho tok biletet som viser at fjellsida på andre sida av vatnet er i ferd med å losne ved Årnes.

Eit 80 meter breitt ras dundra nedover mot fylkesveg 451.

– Eg blei nesten paralysert då eg såg bilane som kom køyrande mot raset. Den eine rygga i full fart. Den andre køyrde rett inn i raset.

– Eg tenkte berre på éin ting. Gud, gjekk dette bra?

Ho seier ho framleis er skjelven etter det ho blei vitne til.

– Det er så lite trafikk på den vegen. Tenk at det skulle kome bilar akkurat då. Livet er tilfeldig.

– Eg såg røykskya koma i full fart nedover

Randi Solheimsnes bur ved Solheimsneset på E39 langs Jølstravatnet.

Frå stoveglaset ser ho rett ut på innsjøen og opp mot fjellet Klauva, der raset gjekk. Også ho blei vitnet til dramaet som fann stad på andre sida av fjorden.

– Eg såg røykskya kome i full fart nedover. Då eg såg bilen, ropte eg til mannen min: Bilen går rett i raset!

Ho blei ståande å sjå over fjorden i håp om at bilen skulle kome ut på andre sida av røykskyen.

– Men bilen kom aldri.

Solheimsnes kjenner godt mannen som er sakna.

– Ein fantastisk hyggeleg mann. Når ein kjenner dei som blir råka blir det så personleg. Det er heilt grufullt, dette her, seier Solheimsnes.