Søndag skal det hølje ned på Vestlandet – igjen

Førre uvêr har knapt passert før eit nytt slår innover vestkysten.

Publisert Publisert

HER SKAL DET REGNE: Dette er ein av modellane som viser kor mykje nedbør det kan bli søndag. Generelt ventar ein mellom 70–100 millimeter lokalt i morgon. Nokre stader kan det kome meir, andre stader mindre. Foto: Stormgeo

  1. Leserne mener

– Det har regna mykje, det skal regne meir og slik vil det berre halde fram.

Slik samanfattar meteorolog ved Stormgeo, Stig-Arild Fagerli januarvêret så langt.

Etter éin dag med opplett er på an igjen søndag ettermiddag. Yr.no har sendt ut gult farevarsel, og melder om at det lokalt kan kome mellom 70–100 millimeter nedbør i løpet av eit døgn.

Også ved Stormgeo ber dei vestlendingane ta på støvlar.

– Ja. Det vil kome mest regn frå Bergen og nordover. Stader som ligg like innanfor kyststripa, som til eksempel Takle og Brekke i Sogn, ligg an til å få aller mest, fortel Fagerli.

MYKJE REGN: Søndag skriv meteorologane hos Yr på Twitter at det blir mykje regn på Vestlandet det neste døgnet. Foto: Meteorologane

Les også

Slik herjar uvêret på Vestlandet

– Skulle tru det var november

Himmelen er venta å opne seg rundt klokka 14 søndag ettermiddag.

– Vi er i vintermånaden januar, men ein skulle nesten tru det var november, fortel meteorologen.

Ironisk nok var november i fjor var den tørraste på heile 98 år, medan januar så langt har vore både våt og vindfull.

VÅTT I VEST: Det blir lite vind, men mykje regn på søndag. Det gjer at ein i det minste kan finne ly under ein paraply. Foto: Alice Bratshaug

VÅTT I VEST: Regnet vil råke Vestlandet frå Bergen og nordover verst, fortel meteorologen. Foto: Eirik Brekke

Regn, regn og regn

Typiske «våte plassar» vil bli verst råka av nedbøren også denne gongen.

– Stader som ligg like innanfor kyststripa, som til eksempel Takle og Brekke i Sogn, ligg an til å få mest regn. Men det vil regne godt heilt frå Nordhordland og opp til Nordfjord, fortel Fagerli.

Så vêrmeldinga er regn, regn og regn?

– Ja, den neste veka vil det i alle fall følast slik, men det kjem ein høgtrykksrygg inn mot neste helg. Så då kan det bli fint. I tillegg skal det vere mildt, og ikkje noko vind å snakke om før vestavinden kjem på onsdag, seier Fagerli.

STORE SØLEPYTTAR: Det kjem endå meir regn til Vestlandet søndag. Slik såg det ut i Bergen 29. desember. Foto: Tuva Åserud

Auka fare for skred

Varsom.no varslar også om betydeleg snøskredfare i Indre Sogn heile denne helga, og ber folk vere forsiktige der det ligg fersk fokksnø i høgda.

Stigande temperatur fører også til auka fare for snøras, fordi snøen smeltar og potensielt store vassmengder renner nedover dalfjørene. Bratte skråningar, samt bekkar og elver med stor vassføring er spesielt utsett.

Søndag vil snøgrensa på Vestlandet flytte seg heilt opp til 800–1000 meter over havet.

– Det ligg snø som endå ikkje er utløyst i fjellet, som kan vere ein trugsel. Ein skal ikkje utfordre det. Det blir mykje nedbør altså, fortel Fagerli.

Publisert