Nokon gir seg ut for å vere politiet: – Ikkje ta telefonar frå 112

Politiet har fått fleire meldingar om at folk har fått oppringingar frå naudnummeret 112.

Vest politidistrikt har i dag fått fleire meldingar frå folk som fortel at dei har blitt ringt opp frå politiet sitt naudnummer 112.

Nokre høyrer ingenting i andre enden, medan andre har meldt om stemmer i bakgrunnen.

– Vi ringjer aldri ut til folk frå telefonnummer 112. Dei gir seg ut for å vere noko anna enn dei er. Vi anbefaler folk å ikkje ta telefonen, seier operasjonsleiar i politiet, Stein Rune Halleraker.

Dersom du likevel skulle ta telefonen, åtvarar politiet mot å gi ut personlege opplysningar. Dei ber også folk ta kontakt dersom dei har opplysningar om kven det er.

– Politiet si IT-avdeling og Telenor samarbeider no om å undersøkje saka, men det er førebels ikkje oppretta nokon straffesak, seier Halleraker.

Førebels veit politiet ikkje kven som står bak telefonane.

– Dersom nokon meiner dei er utsett for noko straffbart frå desse, og trengjer hjelp, så ta kontakt, seier Halleraker.