Satsar stort med Jordal

BORDET FANGAR: «Katitzi» har premiere i oktober, og kan lokke med Helge Jordal som ein av hovudrolleinnehavarane. Saman med resten av skodespelarane var han samla rundt bordet inne i Fyllingsdalen Teater for å promotere stykket.

RUNE MEYER BERENTSEN
  • Eit brennaktuelt tema, seier dagleg leiar i Fyllingsdalen Teater, Jørn Kvist, om storsatsinga «Katitzi». Historia om ei lita romjente har Helge Jordal i ei av hovudrollene.

— Eg ser ut som ein italiensk lommetjuv.

Helge Jordal sit godt tilbakelent i stolen under pressekonferansen ved Fyllingsdalen Theater. Bergensskodespelaren skal til hausten spele i stykket «Katitzi» som settast opp ved barneteateret. "Katitzi" er historia om ein romfamilie i Sverige, og ei ni år gammal jente sitt møte med ein ny kultur. Jordal skal spele familiefaren, men spøker med korleis han ser ut på reklameomslaget.

Jordal framhevar tematikken som hovudgrunnen for å spele i stykket.

— Det handlar om ein minoritet mot storsamfunnet. Problematikken kring romfolket er noko vi i Bergen også må ta stilling til. Det er eit kjempevanskeleg tema, seier Jordal.

Sjølvopplevd hending

«Katitzi» er ført i pennen av Katarina Taikons, og basert på hennar eigne erfaringar med den svenske kulturen som innvandrar frå Aust-Europa. Jordal håpar historia kan vise at vi menneske trass alt er ganske like.

— Forteljinga er tankevekkande fordi den viser at vi menneske ikkje er så forskjellige. Kulturen betyr mykje, men Katitzi vil berre vere som alle andre i nabolaget. Ho vil gå på skulen og ha venner, seier Jordal.

Fordommane mot romkulturen blir bakteppet i teaterstykket som har vore ein kjempesuksess i Sverige. Jordal synest romfolket har mykje å vere stolt over.

— Berre høyr på det vi kallar «Gypsy musikk», det treffer noko i deg. Dynamikken og fridomslengselen i romkulturen er noko vi her i Norden ikkje har på same måten.

Perfekt Jordal

«Katitzi» er Fyllingsdalen Theater si første profesjonelle satsing. Dagleg leiar Jørn Kvist seier dei fall for den universelle historia som stiller spørsmål rundt kvifor folk skal bli behandla annleis.

— Sjølv om Taikons skreiv «Katitzi» på 70-talet, er dette eit brennaktuelt tema. Ho var 26 år gammal då ho lærte å skrive, og brukte tydeleg eigne erfaringar. For oss var det viktig at stykket hadde noko på hjartet, seier Kvist.

Han er svært nøgd med å ha fått med Helge Jordal, som var regissør Karl Erik Solgård sitt store ønske.

— Du merkar det når Helge kjem inn i lokalet, han har ein unik karisma og aura. Han er ein kjempeinspirasjon for alle dei unge som er med. Han er perfekt for denne rolla.