Estetikkambassadørar på heimebane

No får også sambygdingane sjå kunst- og nytteprodukta som har gitt Kirsti Nordberg Moe, Olav Eldøy og Jakob Klippen nasjonal og internasjonal merksemd.

Publisert: Publisert:

OVE ARNE OLDERKJÆR (tekst og foto)

Stord Kunstlag opna laurdag utstillinga «Sofa med hatt, penn og kol» i kulturhuset på Leirvik.

Modist Nordberg Moe og møbeldesignar Eldøy har for lengst sett Stord på estetikkens kart med prislønte kreasjonar i inn— og utland. I 2002 fekk dei biletkunstnar Jakob Klippen med seg på ei fellesutstilling i spanske Alfaz del Pi.

No har trioen teke fram sine siste verk for publikum på heimebane. Kirsti Nordberg Moe med fargesterke hattar og eit første eksemplar av sin nye Kina-serie.

Olav Eldøy presenterer kombinasjonen krakk/bord på ein ny måte, sensuelle stolar i finér, ein ny puff og ein slags trillebårelenestol. Eit par eksemplar av Eldøy-stolen «Date» er også stilt ut, stolen har nesten fått same merksemd som populære «Peel» i si tid fekk.

Den travle designaren i Dåfjorden fortel Bergens Tidende at han skal delta på ei møbelmesse i København i mai, at han er utstillingsaktuell under årets Nattjazz i Bergen, og at han førebur nye møbelproduksjonar i Italia og Japan.

Jakob Klippen - med fleire separatutstillingar, illustrasjon- og utsmykkingsoppdrag bak seg - har hatt ein stor produksjon av store og små bilde å velja i før utstillinga på Stord.

— I arbeida mine søkjer eg etter å få fram vibrasjon og dragning, mellom ljos og mørke, mellom det ein anar og det ein ser, seier Klippen.

Kirsti Nordberg Moe og Olav Eldøy hadde si første «Sofa med hatt»-utstilling i Fengselet på Stord i 1992, og har seinare turnert til Bømlo, Ål, Oslo, og altså Spania.

Stord-utstillinga står til 2.mai.

TRIPPELKUNST: Møbeldesignar Olav Eldøy tv., modist Kirsti Nordberg Moe og biletkunstnar Jakob Klippen har slege sine kreative krefter saman i utstillinga «Sofa med hatt, penn og kol» i Stord kulturhus.

Publisert: