Krossfesta Listhaug henta av studentar midt på natta

Boda renn inn til studentkollektivet i Bergen sentrum. 80.000 kroner er ein person villig til å betale for Listhaug-måleriet.

MIRAKEL: Emma Grace Knox, Ingrid Sofie Wentzel og Anna Bjørnflaten sneik seg ut om natta og henta lerretet. No har dei «pussa det opp» med naglelakkfjernar.

Rune Sævig

– Vi sneik oss ut om natta og henta det, fortel ein av studentane, Ingrid Sofie Wentzel.

Måleriet, som viser Sylvi Listhaug krossfesta over mikrofonar og blomster, kom opp på veggen på hjørnet av Fosswinckels gate natt til 2. påskedag, til sterke reaksjonar.

«Bør tilintetgjøres ASAP, er helt forkastelig å kalle dette kunst, kan mer oppfattes som en trussel mot Listhaug», var ein av dei fleire hundre kommentarane BT tok imot.

Natt til onsdag dekka nokon biletet med svart spraymåling. Måleriet var tapt, trudde fleire.

Men no har det gjenoppstått.

VEGGPRYD: Studentane er usikre på kva dei vil gjere med biletet. – Vi har spurt kunstnaren AFK om han vil ha det tilbake, men ikkje fått svar, fortel Anna Bjørnflaten (til v.). Her saman med romkameratane Emma Grace Knox og Ingrid Sofie Wentzel.

Rune Sævig

I likskap med då Jesus sto opp frå grava, var det ei kvinne som oppdaga at det framleis var liv i Listhaug-kunsten.

– Eg oppdaga at biletet var malt på eit lerret, og ikkje rett på veggen. Same kveld bestemte vi oss for å forsøkje å redde det, fortel Wentzel.

Sneik seg ut om natta

Mange har valfarta til veggen for å sjå biletet, men då folk kom dit torsdag morgon var veggen tom.

– Alle i kollektivet sette på alarm klokka 03.20 den natta. Då er folk gått heim frå byen, og det er stille i gatene. Så kledde vi på oss, og gjekk til hjørnet der måleriet hang og tok det ned på rundt 20 minutt. Vi var redde for å bli oppdaga, fortel ein annan av bebuarane i studentkollektivet, Emma Grace Knox.

På dette tidspunktet kunne ein ikkje sjå noko av motivet, berre eit stort, svart lerret.

– Vi prøvde først å fjerne den svarte målinga med skurekrem, klor og vodka, fortel Knox.

– Det som til slutt fungerte var naglelakkfjernar. Totalt måtte vi bruke fire flasker for å få fram heile biletet av Listhaug igjen. Heile leilegheita stinka, fortel Anna Bjørnflaten.

Då måleriet sakte, men sikkert kom fram, forkynte dei bodskapen om gjenoppstoda i sosiale media.

– Det er jo ei god historie, seier Wentzel.

NYTT LIV: Måleriet av Sylvi Listhaug er ikkje lenger svartmåla.

Rune Sævig

Fått bod på 80.000 kroner

No heng det i stova til jentene i Bergen sentrum. Måleriet er ikkje like klårt som då det først kom opp, men detaljar som Frp-tatoveringa på skuldra til Listhaug viser framleis tydeleg.

– Det tok fleire timar. Då vi såg det fungerte og deler av biletet begynte å vise, blei vi utruleg gira. Det som har fått lide mest er «Min Kamp»-tatoveringa på magen. Den var også spraya over med sølvspray under den svarte målinga, fortel Wentzel.

ORIGINALEN: Slik såg måleriet ut då det blei oppdaga måndag morgon.

Geir Martin Strande

Allereie har jentene fått førespurnadar frå folk som vil kjøpe biletet.

– Det er mest vener av oss. Nokre har spurt om dei kan kjøpe det for 6000 kroner, seier Wentzel.

Fredag kveld tikka det inn enda fleire bod. Ved 22.30-tida opplyste Wentzel at ein person hadde lagt inn eit bod på 80.000 kroner.

Les også

Huseigarane har fått bod på Listhaug-kunsten

– Dette er ikkje tjuveri

Spørsmålet er om det er lov å ta kunstverk som ein finn på gata, eller om det er tjuveri?

– Nei, dette er ikkje tjuveri i utgangspunktet. For at det skal vere det må ein ta noko frå ein annan, med ein plan om skaffe seg noko ein ikkje har krav på. Dette kollektivet har tatt med seg lerretet, utan at det var i nokon si eige. Dei har funne det på gata, så å seie, forklarer førsteamanuensis ved institutt for offentleg rett ved UiO, Synnøve Ugelvik.

Likevel kan det vere problematisk å ta med seg ting ein finn på gata heim.

– Om nokon til eksempel har gløymt jakka si på bussen, kan ein ikkje berre ta den fordi eigaren er vekke. Det er ikkje lov å ha ting som andre eigentleg eig, men strafferamma er mykje lågare enn ved eit tjuveri, seier Ugelvik.

MØRKE: Kunstverket av Sylvi Listhaug blei dekt av svart måling natt til onsdag.

Rune Sævig

I dette tilfellet har AFK sett opp biletet utan lov, og verket vart øydelagt av svart måling. Det største rettslege problemet er om studentane forsøkjer å selje måleriet vidare.

– Det er fordi då ønskjer dei å tene pengar på det, noko som ikkje er avklart med kunstnaren, seier Ugelvik.

Fekk svar frå kunstnaren

Studentkollektivet har kontakta kunstnaren AFK.

Og fredag ettermiddag fekk dei svar. Han skriv, på engelsk, at han set pris på innsatsen studentane har lagt ned for å berge kunstverket, og at dei kan gjere kva dei vil med det.

– Men det ville gjort meg veldig glad om de ga det til ein god sak. Behald litt sjølv for jobben med å restaurere verket sjølvsagt, skriv han.

Han skriv vidare at Gatekunstauksjonen for Palestina kan vere eit slikt godt formål.

– Men igjen, dette er ei gåve frå meg til gatene og det er ikkje opp til meg, skriv AFK i svaret, som er formidla av Petter Nord i Kube Bergen.