No kan homofile gifte seg i kyrkja

Frå og med onsdag kan likekjønna par gifte seg i Den norske kyrkja. – Ein historisk dag for Kyrkja, seier ein gråtkvalt Karl Johan Kirkebø i Åpen folkekirke.

Publisert:

HISTORISK: Måndag vedtok Kyrkjemøtet ny vigselsliturgi som kan brukast av både likekjønna og heterofile par. Foto: Scanpix

NTB

Alt 1. februar kan homofile og lesbiske gifte seg i norske kyrkjer. Måndag føremiddag vedtok Kyrkjemøtet i Trondheim ein ny vigselsliturgi for likekjønna par med 83 mot 29 røyster.

- No vågar vi å vere ei kyrkje. Dette handlar om homofile sine liv, om å sjå og anerkjenne kjærleiken mellom likekjønna, seier ein gråtkvalt Karl Johan Kirkebø på telefon frå Trondheim.

– Vidunderleg!

Han gret nettopp på talarstolen på Kyrkjemøtet, også, der han og eit stort fleirtal stemte ja til den nye liturgien. Kirkebø representerer den liberale organisasjonen Åpen folkekirke i Bjørgvin bispedømeråd

– Det er ikkje berre for ein bedehusmann frå Vestlandet å fronte denne saka. Eg er oppvaksen på bedehuset på Sunnmøre, og for meg har spørsmålet om ein liturgi for likekjønna ført meg ut på eit intellektuell og teologisk reise. Jesus tok side for dei svake, for dei marginaliserte, og det er Jerikos murar vi no bryt ned, seier Kirkebø.

GRÅTKVALT: - Det er vidunderleg, seier Karl Johan Kirkebø i Åpen folkekirke. Foto: Gidske Stark

- Homofile har følt seg tråkka på av Kyrkja. No er dei aksepterte, no anerkjenner vi dei. Det er vidunderleg og grunn til å feire!

Les den nye liturgien på kyrkja.no.

Les også

Alle sokneprestene i Askøy sier nei til å vie homofile

- Kyrkja rommar oss alle

Bak vedtaket ligg ei lang histore med harde frontar mellom tilhengjarar og motstandarar av kyrkjeleg vigsel for likekjønna.

Men i april i fjor vedtok Kyrkjemøtet at det skulle utarbeidast ein kjønnsnøytral liturgi i tillegg til dagens vigselsliturgi for heterofile par. Det er denne som no er vedteken.

EI TÅRE: Også Kristin Gunleiksrud Raaum, leiaren i Kyrkjerådet, måtte felle ei tåre under avrøystinga på Kyrkjemøtet i dag. Foto: Alley, Ned / NTB scanpix

Kristin Gunleiksrud Raaum, leiar i Kyrkjerådet, meiner at den nye liturgien er ein siger for kjærleiken og ekteskapet. Ho forstår at saka vekkjer sterke kjensler i Kyrkja, men er klar i sin konklusjon.

– Det er to teologisk grunngjevne syn i Kyrkja. Kyrkja rommar oss alle. Det viktigste er at alle menneske frå no av kan få gifte seg i Kyrkja.

Publisert: