Verdige fredsprisvinnarar

Det er gledeleg at Nobelkomiteen anerkjenner kvinners lidingar i krig.

FREDSPRIS: Nobelkomiteens leiar, Berit Reiss-Andersen, med bilete av dei to prisvinnarane (f.v.) Nadia Murad og Denis Mukwege. Terje Pedersen, NTB Scanpix

Vinnarane av Nobels fredspris er irakiske Nadia Murad og den kongolesiske gynekologen Denis Mukwege. Begge har fått kampen mot vald og valdtekt mot kvinner i krig opp på den internasjonale dagsordenen.

Nobelkomiteen har valgt to verdige vinnarar, og prisen bør vere ukontroversiell.

Les også

Fredsprisvinnerens niese i Bergen: – Jeg gråt og gråt. Endelig, tenkte jeg.

Murad tilhøyrer yezidi-minoriteten i Irak, som i 2014 vart utsett for eit folkemord av terrorgruppa IS. Den då 19-årige Murad vart kidnappa og halden til fange i tre år. I tida etter har ho reist verda rundt for å tale sivile kvinners sak.Ho har fortalt om dei grufulle overgrepa som ho og tusenvis av andre kvinner vart utsett for.

Mukwege har blitt nominert til fredsprisen fleire gonger for sitt arbeid mot valdtekt som våpen. Han har behandla titusenvis av kvinner som er utsett for dette våpenet, og vigd livet sitt til å tale offeras sak.

Les også

IS-offeret som overlevde og krever rettferdighet

Les også

Denis Mukwege: En kjempe for Kongos voldtatte kvinner

Prisen er utradisjonell, dersom ein måler den mot Alfred Nobels testament. Den er likevel svært viktig, sidan Murad og Mukwege gir merksemd til ein av krigens forferdelege konsekvensar.

Utdelinga betyr at komiteen anerkjenner kvinners lidingar i krig. Meir kunnskap kan hindre overgrep, men òg bidra til at fleire får hjelp.

Les også

Debatt: – En stor oppreisning

Delinga av prisen er med på å synleggjere at slike overgrep ikkje er avgrensa til å gjelde IS eller militsar i Kongo. Valdtekt som våpen er like gammalt som krig, og har blitt skildra heilt sidan antikken.

Under Bosnia-krigen på 90-talet var Vilina Vlas berykta som «valdtektshotell», der serbiske styrkar forgreip seg på bosniske kvinner. Hotellet i Visegrad var langt frå den einaste slike leiren, og sjølv fredsbevarande soldatar frå FN har blitt skulda for overgrep.

Amerikanske soldatar stod for grov, seksualisert vald mot irakiske fangar i Abu Ghraib-fengselet. Prisen kan bidra til at dei som står bak overgrep i større grad vert straffa.

Les også

Jubel for årets fredspristildeling

Murad og Mukwege har sterke forteljingar som kan endre verdssamfunnets handtering av kvinners rettar i krig. Det trengst. I hjelpearbeidet for den utsette Rohingya-folket i Myanmar, er berre to prosent av midlane sett av til kvinners rettar. Støtta til FN-organisasjonen UN Women gjekk ned med fem prosent mellom 2013 og 2016.

Noreg bør følgje opp prisen og ta initiativ til at kvinners rettar i større grad vert prioritert i krigssoner.

Lederen
BTs lederartikler blir skrevet av mediehusets redaktører og kommentargruppe. Politisk redaktør er leder for denne gruppen. Lederne er skrevet på bakgrunn av BTs publisistiske idé, sjefredaktørs meninger og avisens tradisjon. I avisens publisistiske idé heter det:
«Bergens Tidende skal være en frittstående, liberal, borgerlig (ikke-sosialistisk) avis, partipolitisk uavhengig. Avisens generelle grunnsyn skal bygge på et progressivt og menneskelig samfunnssyn. Den redaksjonelle ledelse skal ha som oppgave å lage en avis som gir sine lesere i by og bygd saklig og sann orientering om det som foregår lokalt, nasjonalt og internasjonalt. Redaksjonsledelsensintegritet skal være uavkortet så vel utad som innad».