Av alle prioriteringar i årets statsbudsjett er ofringa av E16 den verste

Hovudvegen mellom landets to største byar er farleg å køyre. Korleis kan regjeringa utsetje dette prosjektet?

Rett før valet i fjor heva stortingsrepresentant Eigil Knutsen (Ap) peikefingeren. Solberg-regjeringa hadde i årevis lova å erstatte den rasfarlege vegen og jarnbana mellom Arna og Voss, og svikta:

«Det er nesten ikke til å tro at Erna Solberg nylig gjentok stuntet på Arna stasjon, og lovte byggestart for K5/E16 mot Voss», skreiv Knutsen i BT.

Torsdag var det han, som no er leiar i finanskomiteen, som forsvarte Arbeidarpartiets første eigne statsbudsjett i Stortinget. Eit budsjett der pengane til prosjektet er fjerna.

Dermed vil det gå endå fleire år der farande mellom landets to største byar må speide nervøst opp mot dei rasfarlege fjellsidene.