Regjeringa har bomma kraftig på prisveksten neste år. Det vil folk merke.

Sjukehus og andre tenester må kutte, med mindre Trygve Slagsvold Vedum finn eit argument for å auke pengebruken.

Fredag auka SSB anslaget for prisveksten neste år, frå 4,5 til 4,9 prosent. Prisane ligg dermed an til å auke nesten dobbelt så mykje som regjeringa har lagt til grunn i statsbudsjettet.

Då dei laga budsjettet, rekna Finansdepartementet med at prisane ville stige med 2,8 prosent neste år. Allereie då budsjettet vart lagt fram i oktober var det klart at dette var altfor lågt.

No ser det altså ut til at spriket blir endå større. Auka prisar vil ete opp budsjetta og tvinge fram kutt.