Raudt har litt rett. Nato gjer for lite for at Ukraina skal vinne krigen.

No får Ukraina vestlege stridsvogner. Men det tok frykteleg lang tid.

Joakim Møllersen sette fyr på våpendebatten i Raudt då han gjesta Debatten på NRK tidlegare i januar.

Han forsvarte Raudts standpunkt om ikkje å sende våpen til Ukraina, eit standpunkt få heldigvis deler. Som ein del av Nato-kritikken, påstod Møllersen at Nato er interessert i å halde krigen gåande.

Det meste av Nato-analysen frå ytre venstre er fråkopla røynda, men sjølv ei øydelagt klokke har rett to gonger i døgeret.

Møllersen har nemleg eitt poeng.

Nato-landa ser ikkje ut til å ha ein strategi der Ukraina skal vinne krigen – berre at dei skal unngå å tape den. Det er oppskrifta på langvarig krig.