I gode og vonde dagar

Borgarlege giftarmål skal bli ei kommunal affære. Med overhengande fare for saksbehandlar-selfiar.

Asbjørn Kristoffersen

TROLLTUNGA: Ordføraren i Odda har alt gjort det kjent at han er villig til å stilla seg opp på Trolltunga i nypussa skor og konfirmasjonsdress og ordførarkjede nedpå brystet, for å vigsla brurepar. Roar Christiansen (arkiv)

Har brur eller brudgom hatt kaninar i lag med ein dommarfullmektig, har det vore grei skuring å bli lovformeleg gift, hengande i ein tandemfallskjerm over Vossevangen. Med fullmektigen i flagrande, svart kappe under ein annan fallskjerm. Helst likbleik. Etter nyttår bør du ha hatt kaninar i lag med ordføraren på Voss om du vil visa for all verda kva slags ekstremsport du skal delta i. Borgarlege giftarmål skal bli ei kommunal affære. Med overhengande fare for saksbehandlar-selfiar.

Ordføraren i Odda har alt gjort det kjent at han er villig til å stilla seg opp på Trolltunga i nypussa skor og konfirmasjonsdress og ordførarkjede nedpå brystet, for å vigsla brurepar som kjem eins ærend frå Portugal, med hundre meter langt, kremfarga brureslep, for bli fotografert ytst på tunga. Med hundre gjestar og sprudlande sider på Tyssedal Hotel, og innslag i Portugal Rundt, kan det fort bli pengar i kommunekassen.

Dei færraste ordførarar har noka tunge å by på. Dei kan ikkje alltid by på seg sjølve, heller. Varaordførarar, utan kjede, og byggjesakssjefar er mobiliserte som reservar. Du risikerer kva som helst av politisk og ideologisk overtyding. Oldemor di kan ha vore i tottane på bestemor til varaordføraren. Då veit du kva slags folk dei er. Byggjesakssjefen kan ha stoppa garasjebygginga di, med hybel til au pairen på loftet. Nok sagt.

Og korleis trur du kommunale folk kjem til å kle seg når dei i vitners nærvær skal skyssa kreti og pleti inn i ekteskapet? Trur du det finst eit skåp for bryllaupsutrykkingsklede på rådhuset, og at byggjesaksavdelinga driv med skopussing og skjortestryking på si’?

Rådhusa må utstyrast med kvite konfirmasjonskapper og svarte lakksko, i alle storleikar, om kommunale vigsler skal gå vel. Og kvar skal vigslinga skje, når ordføraren i Odda ikkje gjev frå seg Trolltunga? Det må vel bli rådhuskantina. Etter lønsj.

Fordelen med å gifta seg kommunalt, er at ein slepp skriva sambuarkontrakt, og at ein kan få ny oppvaskmaskin i bryllaupsgåve. Fordelen for kommunen er at byggjesakssjefen kan bli med på brurebileta.