Eg gler meg til å besøke museet

Som liten gut frå ei lita bygd i Fusa, var noko av det største eg opplevde å reisa til «byd’n» og besøka muséet.

Publisert: Publisert:

STOPPAR UT DYR: Vidar Aa. Djupvik si interesse for dyr vakna då han vitja Naturhistorisk museum som gut. Han har sjølv vore med på å lage utstillinga i museet som opnar att måndag. Foto: Privat

Debattinnlegg

Vidar Aa. Djupvik
Taksidermist

Som liten gut frå ei lita bygd i Fusa, var noko av det største eg opplevde å reisa til «byd’n» og besøka muséet. Besten var min mentor og beste ven i barndomen, og tok meg med. Eg hugsar godt den store døra og alt det spennande som var innanfor. Dette var ein døropnar for naturinteressa eg har hatt sidan.

Eg starta tidleg med å samle på ting: fjør, egg, lort, stein osv. Eg jakta gråtrost, og Besten hjelpte meg å flå ho, før eg kokte den og hadde med som niste på skulen. Eg var nok ein sær og rar fyr!

Interessa for taksidermi (utstopping av fuglar og dyr), fekk eg og tidleg. Då eg var 17, fekk eg kome ned i kjellaren på museet, til Gunnar, som i mange år har vore taksidermist der. Wow! Han viste fram og fortalde. Eg sa sikkert lite, men tenkte desto meir!

I dag er eg sjølv taksidermist, og har vore så heldig å få bidra til museets nye utstillingar. Eg har mange spennande oppdrag, men dette var verkeleg stort! Eg er verkeleg stolt, og Besten har vore med meg heile vegen. Eg har tenkt på han kvar dag eg har jobba med museumsdyra.

Snart skal eg tilbake på museet og sjå dei nye utstillingane. Døra er nok den same. Kvalskjeletta heng i taket, og den store, runde trappa som tek oss opp til dei gamle glasskåpa med utstoppa dyr er der òg.

Men mykje er nytt! Luktene? Gler meg!

Naturhistorisk museum gjenopnar 14. oktober etter å ha vore stengt for rehabilitering sidan 2013.

Publisert:
Din mening betyr noe
I BT trenger du ikke å være ekspert eller politiker for å slippe til. Skriv om det du har på hjertet! Skriv et innlegg