Fire triks for å snike deg unna alt ansvar – alltid

Slik lurer deg unna å rydde rommet (eller andre ting) ved hjelp av taktikkane til nokre av dei mektigaste i landet.

I løpet av tenåra fekk eg fleire gongar flengande kritikk frå foreldra mine fordi eg ikkje rydda rommet mitt.

Min vanlege reaksjon var å snike meg ut og seie «Jada, mamma». Men til slutt tok dei meg, og eg måtte rydde.

I ettertid har eg sett at eg som 15-åring takla denne kritikken på heilt feil måte. Hadde eg visst like mykje om politikk då som i dag, hadde eg takla «rydde rommet-skandalen» på ein heilt anna måte.

Her er triks nokre av dei mektigaste i landet brukar rett som det er, og som kan lære oss alle å bli meir snikete:

Triks 1: Hukommelsestap!

Du kan seie at du ikkje hugsa at du hadde fått beskjed om å rydde. Hjernen din er laga av teflon, og alle minner om rydding glir rett av!

Dette er ein taktikk fleire har brukt for å sleppe unna grove skuldingar utan spesielt store konsekvensar, så då burde jo du kunne sleppe unna å rydde eit lite rom. Nekt for alt, og slepp fri for ansvar og konsekvensar!

Triks 2: Sei at du er i ferd med å gjere ei utgreiing og vil kome tilbake med ein rapport (og gjerne ei konsekvensanalyse i tillegg).

Her kan du kjøpe deg tid. Kanskje så mykje tid at foreldra dine gløymer heile greia.

Sei til dei at du tek rydding på alvor. Derfor vil du kome tilbake med eit svar når prosessen er ferdig. Hugs også å leggje vekt på kor viktig denne utgreiingsprosessen er. Det er faktisk den einaste måten å sikre at det blir rydda på rett måte og avgjersla er forankra internt i familien.

Du må for all del hugse å ALDRI seie kor lang tid prosessen tar.

Triks 3: Sei at du er inne i ein tøff periode.

Du slepp unna med meir om du er inne i ein tøff periode. Dette har både politikarar og kjendisar gode erfaringar med.

Du kan også seie du har eit rotete gen du ikkje kan kontrollere, og nekte å ta ansvar for dine handlingar i det heile.

Triks 4: Sei du er utsett for ei heksejakt og at det føregår eit rotehysteri i heimen.

Om ting verkeleg spissar seg til må du gå i konfrontasjonsmodus.

Sei at foreldra driv ei heksejakt mot deg, og at dei er hysterisk opptekne av rydding. Sleng gjerne på ei formulering som «eg kallar berre ein spade for ein spade» eller «dette går over alle støvelskaft» for å virke meir truverdig.

Du synest kanskje det verkar litt i overkant å samanlikne det å bli brent på bålet med å bli pressa til å rydde rommet? Det har du heilt rett i, men slik kan du ikkje bry deg med når du først har gått for «spinndoktor-stilen».

Problemet er at i det verkelege livet ville desse unnskyldningane aldri fungert.

Ein kan difor lure på kvifor vaksne menneske, som har fått ansvar og makt, brukar dette som standardsvar når dei får beskjed om å rydde opp i mykje større rot enn 15-åringar lagar på rommet.

Ein ting er sikkert. Mamma og pappa hadde teke frå dei mobiltelefonen og sendt dei til sengs.