Youtube gav Preben Fjell eit våpen mot angst

Gjennom år som Youtube-stjerne, såg Preben Fjell (28) når kommentarane byrja å bli verre: Då dei vaksne kom på bana.

GODE VIBBAR: Preben Fjell ønskjer å vidareføre den glade bodskapen frå «Prebz og Dennis», når han til hausten får eiga sendetid på lokalradiostasjonen 5000 Bergen.

  • Hans Ivar Moss Kolseth
  • Bård Bøe (foto)
  • Jannica Luoto (foto)
Publisert Publisert

Første veka på folkehøgskulen forlét Preben Fjell knapt rommet sitt.

Angsten sette kjeppar i hjula for å få nye venar. Han søkte hjelp. På kontoret til inspektøren fekk han høyre det han trong: At det var 90 andre ungdommar på skulen som var like nervøse.

– Eg måtte berre hoppe i det, seier Fjell eit tiår seinare.

Han bestemte seg for å gjere sitt beste.

Nyleg flytta 28-åringen heim til Sotra frå Austlandet, med sambuaren Ida og sonen Olav (1). Denne månaden byrja han i ny jobb ved lokalradioen 5000 Bergen.

FARSROLLA: Fjell tenkjer mykje på korleis han kan vere ein god rollemodell for sonen medan han veks opp.

På ungdomsskulen hadde han vore klassens klovn. På vidaregåande vart han meir alvorleg, sleit med angst og sjølvbilete. Han måtte ha hjelp av psykolog.

På folkehøgskulen løsna det. I løpet av året ved Jeløy folkehøyskole i Moss, laga Fjell sin eigen dans til Tone Damlis «Butterflies». Dansen vart ein gjengangar kvar gong songen kom på radioen, til medelevanes begeistring.

Då skuleåret enda med avslutningsshow, bad dei tynt om å få sjå dansen ein siste gong. På scena fann han igjen gleda ved å underhalde.

Like viktig for dei komande åra vart ein av medelevane. På Jeløya møtte Fjell og Dennis Vareide kvarandre. Som «Prebz og Dennis» blei dei i løpet av få år landets største Youtube-kjendisar.

Dei første episodane vart spelt inn på guterommet til Prebz på Sotra. I byrjinga var det kun å spele inn lyd mens dei tok opp video av dataspel. Etter kvart vart sjåarane nysgjerrige på å få vite meir, dei visste ikkje ein gong korleis Fjell og Vareide såg ut. Det passa godt med ein spørsmålsrunde der dei filma seg sjølve, meinte Vareide.

YOUTUBESTJERNER: «Prebz og Dennis» hadde eventyrleg suksess og 245.000 abonnentar. Foto: Elias Dahlen (arkiv)

Fjell var skeptisk, men stolte på kameraten, som meinte det var ein glimrande idé.

Før dei trykte på den raude rec-knappen, byrja Fjell å sveitte. Han kjente angsten som ein klump i magen.

– Eg var nervøs ut av denne verda, seier han.

Responsen frå sjåarane vart overveldande positiv. Dei ville ha meir.

– Den dagen skjønte eg at jo meir eg set meg sjølv i ukomfortable situasjonar, desto sterkare blir eg, seier Fjell.

Youtube vart ein sjanse til å få endå fleire til å le.

– Å spreie glede til andre var godt for sjølvbiletet, seier han.

Videoar der dei filma seg sjølve vart ein fast del av programmet på kanalen. Fjell opna meir og meir opp ovanfor følgarane. I 2015 bestemte han seg for å fortelje dei noko svært personleg. På video forklarte han kvifor han valde å fjerne mesteparten av magesekken, i ein gastrisk bypass-operasjon.

Videoen fekk nesten 3000 kommentarar. Dei var nesten utelukkande positive.

«Prebz og Dennis» fekk etter kvart fleire hundre tusen følgarar, gjorde stadig liveshow og spelte inn ein eigen kinofilm. I 2018, etter seks år med Youtube, bestemte Fjell og Vareide seg for å gje seg på topp. Dei var klare for noko nytt.

– Det vart ein jobb som alt anna. Sjølv om det var kjekt, tok presset på å lage nye videoar litt av moroa ut av det heile, seier Fjell.

Snart tek han igjen fatt på vlogginga.

No skal han snakke om foreldre sitt tilhøve til dataspel og nettvett. Det blir og ein del videoar av han som spelar. Om Vareide eller medhjelparane frå «Prebz og Dennis» ønskjer å vitje, er dei alltid velkomne.

– De skal ikkje sjå vekk frå at vi tek ein reunion, slik som «Backstreet Boys», om Dennis ønskjer det, seier Fjell.

Youtube skal likevel berre vere eit overskotsprosjekt. Familien er blitt førsteprioritet.

Symbolsk sett vart det markert då datamaskina på guterommet måtte vike for ei barneseng.

FAMILIEN: Olav (1), oppkalla etter kjøpesenterkongen Olav Thon, har nett lært seg å gå. Fjell og sambuaren Ida Førsund har flytta heim til Sotra.

Eitt år gamle Olav har nettopp lært seg å gå. Krabbing er framleis mest effektivt. På altanen viser han stolt fram eit plaskebasseng forma som eit haihovud.

Sonen er kalla opp etter Olav Thon, sidan han som nyfødt fekk ei raud hue og var så rynkete i andletet.

Youtube-stjerna var ikkje vanskeleg å be då sambuaren Ida Førsund føreslo at dei skulle flytte heim til Sotra.

Her har ho planar om å byrje som vaksenlærling i tømrarfaget.

Fjell vil ikkje vere den klassiske faren som skrik etter dommaren på fotballkamp, eller skriv hetsande kommentarar til andre på nett.

På dei seks åra Fjell og Vareide hadde sin Youtube-kanal, gjekk nettstaden frå ungdomsfenomen til allemannseige. Då dei starta i 2012, vart 37 timar video lasta opp kvart minutt. I fjor var tilsvarande tal 563, ifølgje bransjenettstaden Pex. Som nettside er berre Google meir besøkt.

TIPS: Preben Fjell oppfordrar dei som vil lykkast med YouTube om å ikkje tenkje på pengar og ha det mest mogeleg kjekt.

Då dei vaksne kom på bana på Youtube, vart kommentarane merkbart verre, fortel Fjell.

– Når du ser korleis foreldre ter seg på nettet, er det berre naivt å tru at ikkje ungane lærer av det, seier han.

Samtidig har konkurransen om sjåarane blitt større. Før var Youtube noko ungdomar gjorde for å ha det kjekt.

I dag er det sett på som ein karrieremogelegheit, ifølgje Fjell.

Han trur ikkje dei som startar med mål om å tene pengar vil lukkast.

– Mitt beste råd er å ha det som hobby. Om du ikkje har det kjekt, ser folk det på deg.

Til hausten skal han følgje sitt eiget råd, når han får sitt eige program på lokalradiostasjonen 5000 Bergen.

HÅPAR PÅ FLEIRE UNGE LYTTARAR: Preben Fjell skal hjelpe Petter Lavern og radiostasjonen 5000 Bergen å få fleire yngre lyttarar.

– Sjå ikkje vekk frå at det blir ein del dataspel- og fotballprat, seier Fjell.

Sidan 1. juli har han hatt ei fri rolle hos radiostasjonen. Tida flyr når Fjell set seg framfor mikrofonen og live-knappen lyser på miksebordet.

Kollegaene skipa radiostasjonen då bergensavdelinga til P5 vart lagt ned i fjor. Då ein av dei spurte Prebz om han kunne tenkje seg å jobbe med dei, var ikkje Fjell vanskeleg å be.

– Det fine med lyd er at du lærer folk å kjenne, utan å dømme dei for utsjånaden. Ronny Brede Aase, kjent frå P3morgen, viste meg at ein kan få til det meste uansett korleis ein ser ut, seier Fjell.

LIKAR PRESSET: Fjell har lært seg å like det som gjer han redd. Til hausten tek han fatt på nye utfordringar som får hjartet til å hamre.

Då lokalradioen dekka Tysnesfest, var Prebz utegåande reporter. Der fekk han igjen konfrontert angsten. Å gå live på radio vert eit nytt steg ut av komfortsona.

Dummar du deg ut, kan du ikkje gjere noko med det.

– Å ha angst er som å surfe ei bølgje. Det er eg som vel om kjensla skal dra meg under eller skyve meg oppover.

Publisert

Mer fra BT magasinet

  1. BT MAGASINET

    Asbjørn og Hilborg var gift i 67 år. De døde med åtte dagers mellomrom.

  2. BT MAGASINET

    «Bli bergtatt du også»

  3. BT MAGASINET

    – Folk sier at har du først bodd i Sandviken, flytter du aldri herfra. Det gjelder for meg også.

  4. BT MAGASINET

    Her er milliardærkokken ved Bjorøy: – Det var visst det beste han hadde smakt

  5. BT MAGASINET

    Ungene var alene i en kano, ropte konen min. «Lite sannsynlig. De kan jo ikke svømme», svarte jeg. «Nettopp», sa hun.

  6. BT MAGASINET

    – Denne godt skjulte restauranten er Bergens kanskje vakreste uteservering

  1. Radio
  2. Prebz og Dennis
  3. Vågen
  4. Bergen