Den game oselvaren tolte både den sterke straumen og dei opptil ni meter høge bølgjene.

– Men eg brukte fotpumpa flittig for å lensa sjøen som slo inn i båten, seier Audun Nordhus etter den tre nautiske mil lange roturen som blei gjennomført 9. mai.

Havarerte i Nordsjøen

– Her nede veit dei ikkje om nokon som har rodd rundt Hornet før, men det skal vera gjort med kajakk, seier Nordhus på telefon frå Ushuaia i Argentina.

Oljearbeidaren frå Fjelberg, no busett i Os, har hatt base på Aker Seafood sitt anlegg.

Nordhus, som i 1996 havarerte i Nordsjøen då han og ein kamerat prøvde å ro til Shetland i ein oselvar, gjennomførte Kapp Horn-rundinga frå Puerto Williams på Eldlandet i Chile. Han og sambuar Norunn Løberg følgde ein seglbåt sørover frå Ushuaia, med oselvaren på dekk.

Kunne blitt knust

– Den farlegaste manøvren var å låra robåten frå seglbåten i dei høge bølgjene. Båten kunne lett blitt knust, seier Nordhus, som brukte ein time i robåten for å koma seg til Amerikas desidert sørlegaste punkt.

– Første forsøk 8. mai måtte me gi opp på grunn av vêret. Me hamna midt i eit stormsenter, og eg måtte gjera vendereis. Dagen etter stilna det, og då var det berre å kasta seg i båten, fortel Audun Nordhus.

I fjor måtte han gi opp oselvarstuntet sitt på grunn av manglande godkjenning frå argentinske og chilenska styresmakter.