Faizal Shah stod ved politisperringane i Dudley Road i Birmingham det meste av dagen i går. Augo var raude etter ei lang natt.

- Eg prøvde gjenoppliving, men det nytta ikkje. Shazad døydde for oss der på fortauet, seier Shah.

Bak sperringane leitar kriminalteknikarar i kvite kjeledressar og munnbind etter spor ute i den tomme gata. Tre unge menn frå grannelaget vart påkjørte og drepne her: Shazad Ali, broren Abdul Mussavir og Haroon Jahan. Det er det hittil alvorlegaste resultatet av opptøya som har herja England sidan laurdag. Politiet etterforskar saka som trippeldrap. Faizal og vennene såg alt:

—  Dei kom i tre bilar. Den eine, ein svart Audi A4, køyrde rett inn i folkemengda. Det vart gjort med vilje, seier Shah.

Rykte om hemnplanar

Alle vitna BT snakka med, i den vesle gata med låge mursteinshus, i går sa at mennene i bilen var afro-karibiske. Det har lenge vore spenningar mellom asiatar og svarte i desse delane av Birmingham, med fleire alvorlege raseopptøy dei siste 30 åra.

- Rykta seier at det vil kome asiatar frå heile landet for å hemne det som har hendt. Eg fryktar at noko vil skje, seier Raj Rattu (36). Han er ungdomsarbeidar i nabobydelen Handsworth, og kjenner konfliktlinjene alt for godt.

40–50 menn var samla på fortauet kl. 01 natt til i går då drapa skjedde. Dei fleste var frå det pakistanske samfunnet her. Mennene var gått ut for å verne butikkane mot plyndring: Apoteket, teppebutikken, daglegvarebutikken og gatekjøkkenet ved sida av.

Dei visste at bråkmakarar var under vegs, på jakt etter ubeskytta forretningar.- To av bilane køyrde forbi. Den tredje sladda inn på fortauet der vi stod. Shazad vart kasta tre meter til vêrs. Han datt ned att oppå bilen, men sjåføren køyrde berre vidare. Dei brydde seg ikkje, seier Wajid Hussein (25), som ikkje vil ha biletet sitt i avisa.

Han står utanfor moskeen, der dei mannlege slektningane av dei døde har samla seg for å sørgje og be. Shazad Ali hadde nyleg gifta seg, og venta barn.

- Vi kjende dei alle saman. Det var bra karar, familiefolk. Shazad og broren dreiv bilvaskeri. Dei var ikkje bråkmakarar, seier Imran Muhammed (20), som også var vitne til det som enda med drap.

Det bur både asiatar og folk med afrikanske røter i denne delen av Birmingham. I går var nesten ingen svarte å sjå på gatene. Det afro-karibiske kultursenteret, eit steinkast frå staden der dei tre døydde, var stengt.

Knallhard politikritikk

—  Dei er redde, dessverre. Vi gjer alt for å roe folk ned. Men folka her er sinte. Eg redd dei vil prøve å ta hemn, seier Mohammed Abbasi frå Organisasjonen for britiske muslimar (AOBM). Han bur like ved, og brukte dagen til å snakke med folk i gata. Det gjorde også den lokale parlamentarikaren, Shabana Mahmood, frå Labour.

Politiet stilte på eit folkemøte i går ettermiddag, i ein overfylt gymsal lenger opp i gata, for å la folk lette på trykket. Rasande menn, og nokre frå kvinner, skulda politiet for ikkje å ha gjort noko for å verne liv og eigedom.

—  Kvar var de? Kvifor stod de berre og såg på, medan butikkane våre vart plyndra og øydelagde? Politiet bryr seg ikkje om oss, skreik ein av dei.

Politiførstebetjent Sean Russell sa at politiet hadde hatt hendene fulle, med ein valdsbruk i byen som dei aldri tidlegare hadde sett. Han sa dei ikkje vart klare over alvoret i Dudley Road før det var for seint.

— Vi etterforskar ikkje ei trafikkulykke. Vi etterforskar eit trippeldrap. La det vere klinkande klart, sa Russell.

West Midlands Police har sett 60 etterforskarar på saka. Ein mann var i går arrestert, mistenkt for å ha køyrt bilen, og elleve andre er også pågripne, mistenkte for å ha vore innblanda.

- Bruk fornuft

I natt lova politiet å doble talet på betjentar ute i gatene i Birmingham. Mennene i gymsalen var ikkje nøgde, og ville vite kva dei skulle gjere:

- Alle har rett til å forsvare eigedomen sin med rimeleg makt. Men de må bruke fornuft. Vi vil ikkje ha væpna gjengar i gatene våre. De må la oss gjere jobben vår, sa politiinspektør Lloyd Davies. Langt frå alle høyrde kva han sa: Utanfor døra stod eit hundretals opphissa menn som det ikkje var plass til, og diskuterte kva dei skal gjere no.