• Eg kunne nesten symje til butikken i dag. Det er kaotiske tilstandar i Brisbane, seier 22 år gamle Stian Hamre frå Bergen.

Fredag ettermiddag gjer 22 år gamle Stian Hamre seg klar til at syklonen «Marcia» skal treffe kystbyen Brisbane. Syklonen er ikkje venta å treffe byen før laurdag, men allereie fredag ettermiddag er byen prega av kaos.

— Det regnar vanvittig mykje, og det verste vêret er ikkje forbi, seier 22-åringen som bur i Brisbane til BT.

Den tropiske syklonen traff eit tett befolka område på Queensland-kysten, nordaust i Australia fredag morgon. «Marcia» er venta å treffe Brisbane kring klokka 7 laurdag morgon.

- Vil bli katastrofalt

Like etter klokka 23 torsdag kveld norsk tid, blei styrken på syklonen oppgradert til høgaste nivå. Myndigheitene åtvarar mot vindkast opp til 82 meter i sekundet, høg sjø og springflo.

— Dette kjem til å bli katastrofalt. Det er det ingen tvil om, seier visepolitimester Ian Stewart i Queensland-politiet. Han kallar situasjonen «desperat».

- Hald dykk heime

Hamre er i Brisbane for å studere til å bli sjukepleiar på Queensland University of Technology. Denne veka skulle dei eigenleg ha ei sokalla fadderveke, men den er avlyst på grunn av syklonen.

— Alt av aktiviteter på universitetet er avlyst på grunn av vêret. Universitetet har bede oss om å vere forsiktige, seier han.

I byen arbeidar folk iherdig med å leggje ut sandsekkar for å verne bustader mot dei enorme megdene med vatn.

— Ein som jobba i matbutikken i dag fortalte at dei har bestilt inn mykje ekstra matvarer. Folk hamstrar inn ekstra i tilfelle dei skal bli vêrfaste , seier Hamre.

Ventar store øydeleggingar

Meteorologisk institutt i Australia reknar med at syklonen kjem til å forårsake store øydeleggingar på bygningar og elektrisitetsforsyning. Folk blir oppfordra til å halde seg innandøs eller oppsøke senter for evakuering. Alle sjukehus i Queensland er i beredskap.

Syklonen traff land nord for Yeppoon, om lag 670 kilometer nord for Brisbane. No flyttar den seg sørover gjennom eit område med rundt 170.000 innbyggarar. 34 skular og 43 barnehagar har blitt stengt i delstaten, i vente på betre v ê r.

— No blir det spennande å sjå korleis det går i morgon. Somme seier det berre blir mykje regn, andre fryktar at det skal gå heilt gale, seier Hamre.