Åtte månader før den offisielle opninga av Hardangerbrua har dei første køyretøya innteke landets lengste – og ifølgje Vegvesenet verdas åttande lengste — hengebru.

Traller og gaffeltruckar går no i skytteltrafikk for arbeidarane som er i aktivitet på den delen av køyrebanen som er montert. Berre sju av dei i alt 23 brukasseseksjonane manglar før stålbrua ligg i heile si 1310 meters lengde over Eidfjorden mellom Vallavik i Ulvik og Bu i Ullensvang herad.

Opphenginga av dei kinesiskproduserte seksjonane har pågått sidan 28.september. I deler av oktober har det vore for sterk vind i fjorden til å heisa opp dei inntil 60 meter lange og 370 tonn tunge køyrebanebitane frå lasteskipet på fjorden for å festa dei i hengestengene i bruspennet. I alt fire kranar oppå berekablane har vore i sving for å gjennomføra dei teknisk kompliserte løfta.

Kommunikasjonsrådgjevar Geir Brekke i Statens vegvesen seier at det er håp om å bli ferdig med alle seksjonsløfta innan utgangen av oktober. Deretter går det danske selskapet MT Højgaard — entreprenør for stålarbeida på Hardangerbrua - i gang med å sveisa saman seksjonane som utgjer heile brukassen. På sidene har dei alt fått påført oransjefargen som vil vera godt synleg i fjordlandskapet.

BOLTA: Kvar av stålseksjonane blir bolta fast i hengestenger under berekablane og seinare sveiste saman i skøytane i køyrebanen.
Geir Brekke, Statens vegvesen
BYGGEKLOSSAR: I alt 23 stålseksjonar, opptil 60 meter lange, vil utgjera den 1310 meter lange køyrebanen over Eidfjorden i Hardanger.
Geir Brekke, Statens vegvesen
I RUTE: Oppheising av dei 23 bruseksjonane frå lasteskipet Zhen Hua 25 har pågått i heile oktober og nærmar seg slutten.
Geir Brekke, Statens vegvesen