Det var siste kveld på turen og det var fredag den 13. Skipperen på skøyta «Hardsjø» festa ved marinaen på Hjellestad.

Tidleg neste morgon grunnstøytte båten ved Krosshamnsundet i Austevoll. No, nær 16 månader seinare, er skipperen dømt til 30 dagar betinga fengsel av Nordhordland tingrett.

LES OGSÅ: Skøyte på grunn.

Retten slår fast at skipperen hadde ein alkoholpromille på rundt 1,5 på tidspunktet for grunnstøytinga.

Stangeland-båt

«Hardsjø» er eigd av tidlegare stortingsrepresentant og Austevoll-ordførar Magnus Stangeland. Skøyta fekk skader for rundt to millionar kroner, ifølgje dommen.

Utpå kvelden 13. august i fjor ringde skipperen sin eigen fetter for å hjelpe til med å få «Hardsjø» heim til Austevoll neste morgon. Båten hadde då reist frå Måløy, mellom anna med NRK og Dag Lindebjerg i programserien «Kysten rundt».

Fetteren kom neste morgon og vekte skipperen.

— For fin til å miste

På turen skal skipperen før grunnstøytinga ha gått i maskinrommet, mens fetteren stod ved roret. Fetteren sovna, og båten gjekk på grunn. Ingen vart skadd, men båten tok inn mykje vatn.

Då bt.no fekk tak i eigar Magnus Stangeland fem timar etter grunnstøytinga, var han nettopp kome til havaristen.

— Båten er for fin til å miste, sa Stangeland då. Saman med politi og redningsskøyte prøvde då Stangeland å få skøyta tett og av grunna.

Som passasjer

I retten sa skipperen at han såg på seg sjølv som passasjer på turen til Austevoll.

«Dette står i motsetning til tiltaltes umiddelbare forklaring til politiet», skriv tingrettsdommar Gunnar Rode Torvund i dommen.

Der heiter det at politiet på staden ikkje var i tvil om at skipperen var ansvarleg om bord, uavhengig av kven som førte båten. Det var også berre skipperen politiet tok blodprøve av.

- Sleppe ansvar

Retten skriv at skipperens forklaring «bærer preg av ansvarsfraskrivelse og tilpasninger for å slippe å komme i ansvar».

For dommarane framstår det òg uforståeleg kvifor «Hardsjø» måtte reise frå Hjellestad så tidleg på morgonen.

Skipperen blei og dømd til å betale 30.000 kroner i bot.

«Hardsjø» er, ifølgje dommen, framleis på verkstad for utbetringar.

Skipperens forsvarer, Jan Erik Holvik, seier at ei anke vil bli vurdert denne veka.

— Han reagerte på dommen, fordi han meiner at han gjorde sitt for at denne problemstililnga ikkje skulle oppstå, seier Holvik.