Dei ca. 60 tilsette ved lageret vart orientert om planane tysdag, ifølgje logistikkdirektør Halvor Nassvik hos Coop. Matvaregiganten vel etter oppkjøpet å satse vidare på Icas lager på Lønningsflaten ved Flesland.

— Det er for tidleg å seie kva slags konsekvensar dette får for den totale bemanninga, seier Nassvik. Både Coops og Icas lager har i dag ca. 60-70 tilsette.- Ica-lageret på Lønningsflaten har ei god utforming, og er stort nok. Difor har vi vald å satse vidare der, seier Nassvik.

Ica-lageret skulle vekk

For berre to år sidan var planen å leggje ned heile Ica-lageret i Bergen. Den gongen hadde Ica tenkt å gå i kompaniskap med Norgesgruppen, og ville avvikle sin eigen distribusjon i Bergen. 70 tilsette fekk beskjed om at dei kom til å misse jobben. Men så sette Konkurransetilsynet ein stoppar for heile samarbeidet, og Ica-lageret fekk leve vidare.

Adm. dir. Øystein Kahrs i Coop Hordaland trur ikkje det vil bli ei tilsvarande kraftig nedbemanning nå, sjølv om Coop-lageret på Midtun forsvinn.

— Målet er at det skal plukkast meir varer på det eine lageret i framtida enn det har vore gjort på dei to som Ica og Coop har i dag, seier Kahrs.

Begge kunne forsvunne

Ifølgje logistikkdirektør Nassvik vart det også vurdert å forsyne butikkane direkte frå eit stort lager som Coop har på Gardermoen. Det ville fått store konsekvensar for bemanninga i Bergen.

— Ein stor del av varegruppene kunne vi distribuert frå lageret på Austlandet. Men vi ser at vi treng den ledige kapasiteten der, og vel å halde fram i Bergen, seier Nassvik.