Dei etterlatne etter dødsulukka på Ådland bru vurderer å fremje erstatningskrav mot Statens vegvesen, skriv avisa Sunnhordland.

Hadde låg fart

28. februar i år mista nederlandske Dave Gardien (47) og dottera Anja (10) livet etter ei utforkøyring ved Ådland bru. Vogntoget dei satt i køyrde utfor vegen og hamna i elva.

Sabine Wittens og sonen Bas Gardien (12), har no engasjert advokat Stig Nilsen ved Drageset & Preto i Bergen.

– Mi rolle er å vurdera eit erstatningskrav mot dei eventuelt ansvarlege, seier advokat Nilsen til Sunnhordland.

Fant feil

I mars i år kom det fram at det var funne feil på ulukkesbrua.

— I dag ville me aldri bygd eit vegkryss i enden av ei nedoverbakke og inn på ei bru. Det er slikt som kan føra til ulukker, sa Leiv Harald Hanesand til BT i mars.

Han er ansvarleg for trafikktryggleik i Statens vegvesen i Haugesund.

Over 30 meter av autovernet rauk og 19 pålar blei kutta då 50-tonnaren køyrde utfor ulukkesnatta. Ifølgje Vegvesenet sine undersøkingar hadde sjåføren god tid til ferja, og utrekningar syner at vogntoget hadde låg fart.

På berre to og eit halvt år er det skjedd fire alvorlege trafikkulukker på ei strekning på rundt 150 meter ved Ådland bru på Stord.