Etter at BT førre veke meldte om at den lokale gullflankedelfinen hadde vikla seg inn i eit fiskesnøre og blitt skada, har lokale krefter slått seg i lag med Akvariet i Bergen og Mattilsynet for å ta affære.

— Eg ser for meg at til onsdag eller torsdag neste veke er den tida vi treng på dette, bekreftar Akvarie-direktør Kees Ekeli.

Bergingsaksjon

Planen er å fange delfinen og få fjerna snøret han har tulla seg inn i, fortel Ekeli. Planen no er å få samla det naudsynte utstyret og mannskapet som skal til.

Den siste tida har det kome meldingar om at delfinen har vore sakna, men etter tips frå lesarar i området skreiv BT søndag at han var på plass att.

— Han såg like happy og viril ut som tidlegare, sa Einar Fotland, som observerte delfinen i Kallestadvika, om lag tre kilometer sør for Møvik.

Fotland er óg ein av dei som fanga delfinen på video då han leika rundt båten han var i på søndag (sjå video).

- Dårleg stelt

Men sjølv om delfinen framleis verkar leiken og oppegåande er Akvarie-direktør Kees Ekeli ikkje i tvil om at snøret er til plage for dyret.

— Det er udiskutabelt at det er eit stort problem for delfinen. Eg har heller ikkje noko tru på at snøret vil falle av av seg sjølv, sa Ekeli til BT på søndag.

Striledelfinen er ein såkalla gullflankedelfin, ein art som vanlegvis held seg i Middelhavsområda og enda langer sør. Ifølgje Ekeli skjer det likevel at delfinmødrene støter frå seg unge hanndyr, noko som kan gje einslege vandrarar av typen som har heldt til på Sotra dei siste åra.

LEGG PLANAR: Direktør på Akvariet i Bergen, Kees Ekeli, bekreftar at dei er i gong med planleggjinga av ein berginsaksjon for striledelfinen.
Helge Sunde (Arkiv)