38-åringen Agathe Børretzen frå Loddefjord har vore overvektig i heile sitt vaksne liv. Diabetes og glutenallergi fekk vekta til eskalere. Det toppa seg i 2009.

— Eg var ekstremt overvektig og hadde BMI på over 40, fortel Børretzen.

— Eg ville rett og slett bli frisk!

Dei siste tre åra har ho gått nær 30 kilo. I vår melde ho seg inn Tjukkasgjengen, ei mosjonsgruppe på Facebook med snart 19.000 medlemmer. Kvar veke mosjonerer Børretzen i lag med nye turkameratar, og i dag tok ho følgje med helseminister Anne-Grete Strøm-Erichsen og andre nordiske ministrar på Solstrand i Os kommune.

— Tjukkasgjengen er ein fantastisk bevegelse, sa den norske statsråden før start.

— Dei har bokstavleg talt tatt saka og stavane i eigne hender.

- Folk blir større

Eit langt følgje av tjukkasar og ministrar og mosjonistar og byråkratar spaserte langs den vakre Kyststien like ved Solstrand. Henriette Kårevik (37) frå Tjukkasgjengen gjekk i lag med den islandske velferdsministeren Guđbjartur Hannesson.

Tjukkasgjengen, som såg dagens lys i Moss i januar år, har fått avdelingar i seks andre land, men islendingen hadde ikkje høyrt om Facebook-fenomenet før.

— Islendingar går generelt mykje tur, men vi har same problem som andre land: Folk blir større, sa Hannesson.

- Søren heller!

Henriette Kårevik melde seg inn i Tjukkasgjengen etter å ha sett eit innslag på NRK.

— Søren heller, tenkte eg! Dette passar for meg, fortel Kårevik, som alltid har likt å gå tur.

— Er du med i Tjukkasgjengen slepp du å gå aleine. Og du kjem deg ut i frisk luft, som er godt for kropp og sjel. Ekstra motiverande er det å møte så mange nye folk. Sosiale medier er genialt for ein grasrotbevegelse som Tjukkasgjengen!

— Men det er vel ikkje særleg stas å bli kalla tjukkas...?

— Tvert om! Eg trur namnet faktisk er ein del av suksessen. Ordet tjukkas viser at vi har sjølvironi og ikkje tek alt så alvorleg. Vi må ikkje opp på alle fjell eller springe langt. Vi vil ha det gøy!

- Redd for å trene

Agathe Børretzen gjekk Kyststien i lag med den norske ministeren og hadde med seg eit brev til henne. I brevet fortalde Børretzen om seg sjølv og om kampen mot overvekt og helseskadeleg livsstil.

— Eg var redd for å trene og redd for å gå i gang på eiga hand. Det var smertefullt og traumatisk. Eg kjende det som eg var døden nær.

Redninga for Børretzen vart eit fire veker langt opphald på Tonsåsen rehabilitering.

— Eg vart kasta ut i trening frå første dag, møtte andre i same situasjon og følte meg trygg. Livet mitt snudde.

— Kva betyr Tjukkasgjengen for deg?

— Veldig mykje. Du slepp å ringe rundt for å få med folk på tur. Du kan berre leggje ut ei melding på Facebook, og så slepp du å gå aleine. Å skli rundt på glatte bergsider når du er over 90 kilo kan vere farleg. Det er tryggare når andre er med, seier Børretzen.

Skal få svar

I brevet til statsråden er ho særleg oppteken av at gymfaget skal bli meir inkluderande. Av at beskjeden om å "trene meir og ete mindre" ikkje alltid er tilstrekkeleg for folk med størst behov for varig livsstilsendring. Og at mange har behov for institusjonar som Tonsåsen for å klare å bli fysisk aktive og gå ned i vekt.

— Eg har fått brevet ditt, og eg skal svare deg, sa Strøm-Erichsen etter turen.

— Går du ofte tur sjølv?

— Eg har vore veldig flink i det siste og gått tur i fjellet kvar helg. Når eg er i Oslo, blir det ikkje like mykje, men eg trenar i kjellaren i regjeringskvartalet, svarar statsråden.

— Men du har aldri vore tjukkas?

— Eg var faktisk ganske overvektig som barn. Sjølv om det ikkje er slik lenger, må også eg passe på kva et eg.

IHUGA MOSJONIST: - Nokon trener for å sjå ut som gudar. Eg trenar for å ikkje møte min for tidleg, seier Agathe Børretzen, som har gått ned nær 30 kilo på tre år.
Odd Mehus