I haust skreiv me om Salhus Trikotasjemuseum som var på jakt etter dine gamle Krone Makko underbukser. No er resultatet komen på veggen.

Industriminne

– Responsen har vore overveldande, seier avdelingsleiar Ann Kristin Ramstrøm.

– Me har fått inn unike truser og anna spanande, og tekstilkunstnar Maria Manuela Rodrigues har no laga ei utstilling av dei innsamla plagga.

Norsk Trikotasjemuseum er er saman med ti andre teknisk-industrielle museumsanlegg vald ut av Kulturminneåret 2009 til prosjektet «Fordums kraft — nytt liv. Industriminner i møte med vår tid». Dette er eit nasjonalt dokumentasjons- og kunstprosjekt der blant anna industriminnet Salhus Tricotagefabrik skal formidlast på ein ny måte.

Tekstilar i ny drakt

På torsdag vil tekstilar produserte på Salhus Tricotagefabrik framstå i nytt lys og i ny drakt. I utstillinga vil det for første gong også bli stilt ut tekstilar som ikkje har vore vist før.

– Me har vore i magasinet og leita fram unike tekstilar. Kanskje du har brukt nokon av desse sjølv? spør Ramstrøm.

Utstillinga blir opna av Thor Brekkeflat (AP), medlem av komite for kultur, idrett og næring.

Det blir musikk ved Albert og Elise, og kunstnaren vil sjølv vere til stade under utstillingsopninga.

Meir informasjon: www.maria-rodrigues.no og www.muho.no

Salhus Trikotasjemuseum, torsdag 2. april kl. 19.

Les fleire Åsane-saker på www.aasanetidende.no

KVARDAGENS UNDERBUKSER: – Plagga fortel om kvardagen, seier tekstilkunstnar Maria Manuela Rodrigues, som i haust fekk oppgåva med å laga kunstverk av dine gamle Krone Makko underbukser. Torsdag får du sjå resultatet.
Magne Fonn Hafskor