Utanfor Fløibanen sin nedre stasjon står turistar i kø for å kome seg til fjells. Fremst står det tyske ekteparet Tilmann Kumler og Katrin Meiser.

— Vi kom til Norge for å sjå fjordane og for å oppleve naturen, seier Kumler før han stig på "Blåmannen" som skal frakte han til toppen.

Det tyske ekteparet er to av 2,5 millionar forventa besøkjande i løpet av 2013 i Bergen.

— Vi er i rute. 2012 var tidenes år med tanke på volum, og klarer vi å halde det same i år, er det bra, seier reiselivsdirektør Ole Warberg.

Det ser lyst ut for hotella i Bergen var fullast i landet i mai, og hittil i juni ligg rombelegget på 89 prosent (sjå fakta).

Rekordbra mai

"Blåmannen" stig oppover, og turistane fotograferer ivrig. I mai registrerte Fløibanen 148.000 påstigingar. Det er det beste resultat nokosinne, og vel tusen fleire enn i fjor.

— Også i juni ligg vi så langt ganske bra an, og det ser ut som vi kjem ut med omtrent same resultat som i fjor, seier direktør Trond Amland.

Juli er den viktigaste månaden, og Amland ventar å nå fjorårets resultat med 260.000 påstigingar.

— Då er det fullt, meir har vi ikkje kapasitet til. Det er meldt inn stor cruisetrafikk, så det slår stort ut, seier Amland.

Det er venta nærmare ein halv million cruiseturistar i Bergen i år, ein solid auke frå rekorden på knapt 450.000 i fjor.

Framfor fjoråret

På utsiktsplatået på Fløyen er det stort sett ein ting det går i: å forevige byen gjennom kameralinsa. Kumler og Meiser skil seg ikkje frå resten av turistane.

— Det er overveldande, fantastisk, skryt Kumler.

Det er utsikta som lokkar folk opp, meiner Amland. Det same gjeld for Ulriksbanen, fortel dagleg leiar Anthony Hutchinson. Her avgjer vêret mykje.

— Vêret har vore veldig vekslande. Temperaturane har gått opp og ned som ein jojo, og det merkar vi på besøkstala, seier Hutchinson.

Hittil i år har 83.000 tatt bana til Ulriken, mot 79.000 på same tid i fjor. 2012 enda til slutt med 160.000 besøkjande, og Hutchinson håpar dette året kan slå rekorden på 162.000.

— Vi er optimistiske, seier han.

Også Akvariet ligg framfor fjoråret i besøkstal. Hittil har 96.000 besøkt attraksjonen, som er rundt 5000 fleire enn på same tid i fjor.

— Vi trur sommaren blir ganske lik fjorårets, men vi håpar på litt høgare tal, seier marknadsansvarleg Jeanett Vie.

Fleire norske turistar

Ifølgje reiselivsdirektør Ole Warberg er turistane i Bergen 60 prosent nordmenn og 40 prosent utlendingar. Medan naturen trekkjer utanlandske turistar, er dei norske meir opptekne av arrangement.

— Bergen er blitt ein meir levande by dei siste ti åra og det merkast på tal tilreisande.

Reiselivsdirektøren har stor tru på at sommaren i Bergen skal bli bra.

— Folk eg snakkar med trur at sommaren blir omtrent som i fjor, som var eit veldig bra år. Vi er forsiktig positive, men veit at mange marknader slit. Men tydelegvis vil folk til Bergen både på konferansar og fritids- og feriereiser, seier Warberg.