— Mennene får lov til å vere med, men dei glimrar med sitt fråvær. Vi hadde ein som har vore med av og til, men for det meste er det mødrer, seier Hilde Tenold. I den raude barnevogna sit Maria (8,5 månad) og leikar med ei vassflaske.

Rundt henne står 11 andre barnevogner, alle klare til luftetur. Det minste nurket er berre ei veke gammal.

- Barnevognsmafiaen

Måndag og onsdag klokka 12 er faste trilletidspunkt. I dag var det ført opp ein ekstra runde, og feriefolk hadde sjansen til å hengje seg på.

— Vi starta opp like før jul, og hengte opp eit par plakatar. Etter kvart har fleire og fleire blitt med, fortel initiativtakar Britt Valsvik.

Det varierer frå gong til gong, men på det meste har 16 mødrer og 18 born delteke i det digre følgjet.

— I bygda kallar dei oss berre for barnevognsmafiaen, seier Valsvik og ler.

Ruta på fire kilometer er den same kvar gong, uansett vêr.

— Eg hadde nok ikkje kome meg ut så ofte hadde det ikkje vore for denne faste trimavgangen. Her kan vi diskutere alt om småbarn, og løyse små og store verdsproblem, seier Lilly Nesse.

Amming og vaflar

Etter trimturen er det fast stopp på ostebaren på < >.

— Vi går ein time og så blir det gjerne ein times stopp der og, seier Nesse.

Her blir det amming, vaffeleting, kaffidrikking og gammalost, for dei som liker det.

— Det er veldig sosialt og kjekt, særleg for oss som er nyinnflytta er dette eit flott tilbod, seier Monica Vattedal Helgesen.

Ho og mannen slo seg ned i Vik for to år sidan, og sidan har det blitt to born. Olav på seks månader kosar seg med smokken i vogna.

Smittande barnelyst

I fjor kom 33 born til verda i Vik, og utviklinga er positiv. Til samanlikning vart det fødd 29 ungar i 2004.

— Det er mange som får tre og fire born, og kanskje smittar det over. Vi gjer så godt vi kan for å halde folketalet oppe, seier Helgesen.

Kvinnene er samde om at Vik er ein god plass å slå seg ned.

— Kva betyr trilleklubben for bygda?

— Den er eit teikn på at vi trivst. Mange har flytta heim att, og det er positivt, seier Valsvik.

Kva meiner du om tiltaket? Sei di meining!

Her kan du besøke BT-båten

STORE OG SMÅ: Frå venstre: Reidun Austbø med Olag (7 mnd), Kjersti Veseth Kinden med Signe (2,5 mnd), Mariann Jomisko og Svein Arne Drægni med Anna (1 år), Gro Ramberg med Trygve (7,5 mnd), Oddveig Nummedal med Jon Arve (10,5 mnd), Lilly Nesse med Eirin (8 mnd), Hilde-Anett Apelseth med Sofie (9 mnd) og William (2,5 år), Monica Vattedal Helgesen og Olav (6 mnd), Turid Finne Christensen og Jarle Christensen med Sander (15 mnd) og Emil (1 mnd), Jarle Liljedahl Tveit og Toril Karlengen Tveit med Alex (14 mnd, Hilde Tenold med Maria (8,5 mnd), Vegard V. Kinden og Britt Valsvik med Mia (1 år), Silje Følid og Bjørge Berglund med Eirik (1,5 år), Vivian Braathen og Annika Celin (11 mnd).
målfrid bordvik
FULL FART: Trafikken må berre skygge unna når denne kortesjen går gjennom Vik.
målfrid bordvik