Politiet fekk melding om brannen 02.24 natt til laurdag frå ein forbipasserande.

Ein bil tok fyr og brannen spreidde seg til to andre bilar på parkeringsplassen i byggjefeltet i Hornnes. Naudetatane rykka ut, og brannvesenet hadde kontroll på brannen klokka 02.42.

To av bileigarane er varsla, men eit av køyretøya er ikkje identifisert enno.

— På grunn av temperatur og avgassar, må vi vente til det har kjølna for å undersøkje bilane nærmare, seier operasjonsleiar Trond Hatlenes i Sogn og Fjordane politidistrikt.

Han kan ikkje seie noko om det er grunn til å tru at brannen er påsett.

— Ein brannetterforskar skal undersøkje køyretøya og ta ei vurdering, seier Hatlenes.

Bilane har fått store skadar. Området er sperra av, fram til politiet får undersøkt det nærmare.