Dødsulukka i Bømlafjordtunnelen skjedde i november 2011.

Statsadvokaten i Rogaland har no teke ut tiltale mot ein 43 år gammal mann frå Os i Hordaland, skriv sunnhordland.no i dag.

Bil på hengaren

Mannen er tiltalt etter paragraf 239 i straffelova. Og saka skal opp i Sunnhordland tingrett i april.

Bilføraren skal ha lasta altfor tungt på tilhengaren, og hadde ikkje godkjent førarkort for denne transporten. No er han tiltalt for trafikkdrap på Sigurd Østensen (45).

Mannen frå Os var på veg nordover gjennom Bømlafjordtunnelen ein novemberkveld i 2011. Han køyrde ein Chrysler Voyager, med tilhengjar. På tilhengaren stod ein Ford Explorer.

Døde på sjukehuset

Medan han var på veg nedover den bratte tunnelen skal han ifølgje tiltalen ha mista kontrollen over bil og hengar, slik at vogntoget starta å vingla frå side til side.

Til slutt enda heile vogntoget over i motsett køyrebane, der det trefte bilen til Sigurd Østensen. Østensen vart køyrt til sjukehus etter ulukka, kritisk skadd. Han døydde tre dagar seinare av skadane han pådrog seg, skriv sunnhordland.no.

Sigurd Østensen var busett i Sveio. Han etterlét seg kone og tre barn.