Både politiets kriminalteknikrarar og havarikommisjonen var klare til å undersøkja den havarerte taubåten «Starkad» som blei snudd på rett kjøl i dag.

Den 55 år gamle kapteinen frå Stord mista livet då fartøyet blei drege rundt av eit fiskebåtskrog under slep som skulle bukserast til kai ved verftet Fitjar Mekaniske Verksted laurdag føremiddag. Matrosen overlevde og blei berga av lokale fiskarar.

Miniubåt

Det var eit kranfartøy frå Halsnøy-selskapet Eide Marine Services som snudde havaristen ved Fitjar-verftet i ettermiddag, med miniubåtassistanse frå Amundsen Diving.

Når politiet og to havariinspektørar går om bord i havaristen, er dei interesserte i å finna ut mest mulig om tekniske forhold som motorpådrag, rorstilling og eventuelle elektroniske registreringar. Ifølgje havariinspektør Trond Evensen er også opplysningar om forhold kring båten sin stabilitet og slepekrok interessante.

Skulle assistera

Farsund Fortøyningsselskap sin slepebåt «FFS Atlas» hadde hovudansvar for slepet av fiskebåtskroget frå Polen til Fitjar Mekaniske Verksted. MS «Starkad» skulle berre assistera med slepetrosse i akterenden av skroget for å få det trygt til kai ved utrustningsverftet.

Brått kom slepetrossa på tvers av taubåten og drog han regelrett rundt i sjøen på kort tid. Det er årsaka til at båten kom i denne posisjonen som politi og Statens havarikommisjon jaktar på. Mannskapet på Farsund-båten er avhøyrt av kommisjonen.