TERJE ULVEDAL Fredsskulen United World College (UWC) og rehabiliteringssenteret på Haugland er dronningas hjartebarn. Så seint som før jul var senteret trua av nedlegging. Regjeringa ville kutte støtta til skulen med elevar frå 80 ulike land. Mange av studentane kjem frå dei fattigaste av dei fattige, og får på UWC sin livs sjanse. Men stortinget greip inn og redda skulen. Og i går kom dronninga.

— Det er utruleg spennande. Vi gler oss til å vise kulturprogrammet vårt, seier danske Mette Larsen, travelt oppteken med siste øvingane. Mette og medstudent Charlie Dougherty frå USA var vertskap for dronning Sonja under middagen i går kveld.

— I mitt land har vi ikkje kongelege, så det er spesielt å sjå korleis dei blir tatt mot, seier Charlie. Han såg fram til å snakke kunst under bordseta:

— Eg har studert kunsthistorie, så eg trur vi har noko felles å snakke om der.

Dronning Sonja besøkte Haugland første gong då ho var visepresident i Røde Kors i 1988. Sju år seinare stod ho for den offisielle opninga av verdsgymnaset. Det er heller ikkje nokon stor løyndom at dronninga spelte ein aktiv rolle for å få etablert Fjaler-skulen. Ho har også vore på tre private besøk til skulen.

Og at dronninga sette pris på å komme tilbake til Haugland var tydeleg. UWC-direktør Magne Bjergene fekk ein varm klem då dronninga steig ut av bilen.

— Vi ser på dette som ei støtteerklæring, seier Bjergene, som har vore med sidan startfasen på Haugland tidleg på 80-talet.

— Dette viser at dronninga står for det ho har vore med på å få til her.

GLEDELEG GJENSYN: Dronning Sonja gav UWC-direktør Magne Bjergene ein varm klem då ho kom til Haugland for sjette gong. Knapt nokon stad har hatt så mange dronningbesøk.<p/>FOTO: ODDLEIV APNESETH