Diesel til ein verdi av over 25 000 kroner vart stolen frå anleggsområdet til Jordalen Maskin AS på Sleen i Voss kommune i helga, skriv Avisa Hordaland.

Dieseltankane på området skal ha vore nyfylte i førre veke. Då Jordalen Maskin AS skulle fylle på med diesel over helga, var tanken tom.

— Dei er rimeleg freidige og kan ikkje vere særleg redde for å verta tekne i alle høve, seier Stig Erlend Jordalen i Jordalen Maskin AS til Avisa Hordaland.

Mistenkjelege køyretøy

Men det er ikkje det einaste dieseltjuveriet på Voss den siste veka. Onsdag vart det stole 200 liter diesel frå Voss olje i Brynalii. Politiet mistenkjer at det er snakk om dei same tjuvane.

Ein kjenning av Jordalen fortel til Hordaland at han har sett to mistenkjelege britisk-registrerte køyretøy på Vossestrand dei seinare dagane.

— Dei som sat inni hadde på seg arbeidsklede, og bak på lasteplanet låg det eit eller fleire 200-liter oljefat og slang, seier mannen til Avisa Hordaland.

Ifølgje Jordalen er det britiske stein- og asfaltleggjarar som er tjuvane.

— Mest truleg har dei hatt flyttehjelp av større bilar, seier han til avisa.

Åtvarar mot anleggsarbeidarane

Anleggsarbeidarane skal ha vore på Voss sidan før helga.

— Vi har fått ei god beskriving av bilen som vart observert i Brynalii og har varsla politikollegaer i Sogn og Fjordane politidistrikt som vil sjå etter bilen, sa politibetjent Jostein Pedersen ved Voss lensmannsdistrikt til Hordaland onsdag.

Måndag gjekk politiet på Voss ut og åtvara mot stein- og asfaltarbeidarane.

— Dei tilbyr jobbane rimeleg utførde, jobbar som regel svart og krev betaling på forskot, ofte utan å fullføra det avtalte arbeidet, skriv politiet.no.

— Vi vil oppmoda publikum om å tenkja seg om før dei takkar ja til slike gode tilbod, sa førstepolitibetjent Einar Bystøl til Hordaland på måndag.