Vinteren nektar å respektere vikeplikta i år. I vestlandsfjella ligg snøen ligg framleis kvit og tung etter ein snørik vinter.

Særleg nord for Hardangerfjorden er snømengdene uvanleg store, viser den siste snørapporten frå NVE (Norges vassdrags— og energidirektorat).

— Men eigentleg er det masse snø i alle fjellområda vest for vasskiljet, seier NVE-hydrolog Heidi Backe Stranden.

Blir den liggjande?

Ikkje sidan målingane tok til i 1971 har det vore meir snø i fjellet midtvegs i juni.

— For skientusiastar er dette ordentleg moro, seier hydrologen.

- Blir snøen liggjande til neste vinter?

— Det ville i så fall blitt for ein isbre å rekne, men snøen pleier å smelte kvar vår. Det reknar vi med at han gjer i år også.

- Kan det bli fare for flaum?

— Held vêret fram med temperaturar som ikkje er spesielt høge, vil snøen smelte pent og pynteleg utan fare for flaum. Men ei heitebølgje kombinert med regn vil ikkje vere gunstig, seier Stranden.

- Heldig

I Trøndelag er det også meir snø enn normalt nokre stader, viser snørapporten til NVE. Elles er det normale snømengder i landet.

Finnmark er i ferd med å bli snøfritt. På Austlandet går snøgrensa høgt, og i Hedmark er det så å seie snøfritt. Berre i Langfjella og fjellområda mot Vestlandet ligg det att snø.

Særleg fjellområda i Nordfjord, Sunnfjord og Sogn opp mot Vikafjellet har mykje snø i juni. For dei som ikkje har fått nok av ski i vinter, er det med andre ord fullt mogleg med fine turar til fjells.

— Vestlandet har vore heldig i heile vinter med mykje snø. Sjølv om ein del har smelta, ligg det mykje att, seier Stranden.

KVIT JUNI: Snømengdene er rekordstore i vestlandsfjella. På Vikafjellet er det framleis kvitt.
KJERSTI MJØR