Sigmund Gravdal blei i fjor sommar drepen med ei lang rekke slag med ulike verktøy. Gravdal, som budde på Sandvoll i Kvinnherad, blei 65 år gamal.

I Sunnhordland tingrett fortalde i dag den eine av dei to drapssikta kvinnene om kva ho hugsar av drapsnatta.

Ifølgje 37-åringen sjølv, er det ganske lite. Dei to kvinnene hadde først vore heime hos den eldste av dei. Etter kvart som det blei tomt for alkohol og pillar der, ville dei reise til Gravdal.

— Han var kjend for å ha ein del drikkevarer. Eg køyrde og ho satt på, og viste meg kor eg skulle parkere, sa 37-åringen.

Preik og vodka

Etter køyreturen til Sandvoll, forklarte ho, var dei velkomne hos han. Ho hadde aldri møtt Gravdal før.

— Vi preika litt. Det tok ikkje lang tid før vi hadde vodka, sa kvinna.

På stigande rus, etter å ha drukke og tatt pillar gjennom kvelden, seier kvinna at ho rekna med å ha somna i ei seng i overetasjen.

— Eg hugsar ikkje alt som skjedde. Eg hugsar at det var veldig grisete i andre etasje. At alt låg hulter til bulter, sa kvinna i retten i dag.

DRAPSSAK: To kvinner sit som tiltalte etter at Sigmund Gravdal (65) blei slått i hel 24. juli i fjor. Ei 48 år gammal kvinne har tilstått, men seier det var i naudverge.
Odd E. Nerbø (arkiv)

Derifrå har ho ikkje minne om noko dramatisk.

— Eg har ingen bilete av at eg har sett vald. Eller hørt skriking. Eg har ikkje fått med meg at dei har krangla. Eg kan nesten ikkje hugse at eg var med dei, anna enn heilt i byrjinga. Det høyres rart ut, men eg kan ikkje hugse å ha veksla eit ord med Sigmund, sa kvinna.

Dunka døra i Gravdals hovud

Ifølgje ho, er det første minnet av at ho såg Gravdal død då ho opna ytterdøra.

— Grunnen til at eg hugsar det, er at eg opna døra. Så kom døra borti hovudet til Sigmund. Eg har fleire bilete av at han ligg der. Eg har ikkje oppfatta at han var død. Når du er veldig full, eg veit ikkje, eg har ikkje oppfatta alvoret i at han var død, forklarte kvinna.

Av den medtiltalte vennina er ho derimot blitt forklart korleis ho kom til.

— (Den andre kvinna, red. anm.) hadde ropt etter meg, lenge. Til slutt hadde eg kome, tatt tak i ryggen hennar, ho var i kneståande over Sigmund, og dratt ho vekk, sa 37-åringen.

Blodsprut som bevis

Både buksa og jakka til den 37 år gamle bergenskvinna vart funne på åstaden, med blodsprut på venstre side. For politiet er det eit hovudbevis for deira påstand om at 37-åringen

Statsadvokat Trond Høvik, som er aktor i saka, vil ikkje kommentere dette. I utspørringa spurte han 37-åringen korleis buksa og jakka kunne få blodsprut på seg, dersom ho var i skjul bak den andre kvinna.

— Om ho sto på huk og bøyde seg ned, kan det ha skjedd slag i dei sekunda. Eg kan ha vore litt på sida av ho, sa kvinna om si 48 år gamle venninne.

Den 48 år gamle kvinna skal forklare seg i morgon. Ho erkjenner ikkje straffskuld for noko. I politiavhøyr har ho forklart at ho handla i naudverge, etter at Gravdal gjorde seksuelle tilnærmingar.

Tidspunkta

Politiet mistenker at drapet kan ha skjedd fordi Gravdal forsøkte å hindre ein eller begge kvinnene å stikke av med tjuvgods.

Gravdal døydde truleg i dei tidlege timane av 24. juli 2013. Dette er nokre av dei sentrale tidspunkta:

  • Kvelden 23. juli: Dei to tiltalte treffes igjen, for første gong på lenge. Dei rusar seg heime hos 48-åringen først, før dei køyrer til Sigmund Gravdal for å ruse seg vidare.
  • Etter midnatt, første timane av 24. juli: Truleg dødstidspunkt for Sigmund Gravdal, men med fleire timars feilmargin.
  • Rundt kl 14: To kvinner er observert av eit vitne som gåande langs vegen ved Gravdals hus.
  • Klokka 14.40: 48-åringen sett av politiet i eit busskur ikkje langt frå åstaden. Ho ba om å bli køyrd heim, noko dei gjorde.
  • Klokka 16.39: Ein nabo av Gravdal ringer politiet om at ein bil (som 37-åringen kom i), sto feilparkert ved Gravdals bustad. Politiet køyrer mot huset. På vegen møter dei på ein taxi med 37-åringen i, på veg heim.
  • 22.03: Politiet mottar oppringing frå 37-åringen, som fortel om ein død mann.
  • Klokka 22.30 og utover: Politiet kjem til åstaden.
  • 25. juli, klokka 1.05: 37-åringen blir pågripe av politiet. Blodprøve halvanna time seinare viser promille på 1,5. * Klokka 1.50: 48-åringen blir arrestert av politiet. Blodprøve viser promille på 3,06. Dei to kvinnene er tiltalte for forsettleg drap. Ti dagar er sett av til saka i Sunnhordland tingrett.