EYSTEIN RØSSUM EIR STEGANE

Den 19 år gamle mannen er sikta for valdtekt, og vart fengsla med brev— og besøksforbod. Valdtekta skal ha funne stad i Bergen vest i juli, under ein privatfest der mange ungdommar var samla.

Dei to skal ha kjent kvarandre frå før, og jenta har først i ettertid fortalt til folk rundt seg kva ho vart utsett for. Deretter vart saka meldt til politiet.

— Saka er grov, men det står etter forholda bra til med jenta, seier bistandsadvokaten til jenta, Beate Hamre Aasnæs.

19-åringen vart pågripen av politiet måndag, og sat i politiavhøyr måndag og i går. Han nektar straffskuld.

Politiet har fått forklaringar frå ein del personar som har vore i kontakt med jenta i etterkant. Forklaringane skal etter det Bergens Tidende forstår i stor grad byggje oppunder det jenta sjølv har sagt.

Politiet var i går svært forsiktige med å gje ut opplysingar om nøyaktig kva jenta har forklart, fordi dei ikkje vil påverke eventuelle vitne som kan ha sett eller høyrt noko. Dette er også årsaka til at retten påla 19-åringen brev- og besøksforbod.

Fengslingsmøtet gjekk for stengde dører, etter ønskje frå 19-åringens forsvarar, Knut Mannsåker.