Over 180 på Facebook er allereie påmelde til det initiativtakarane har kalla «Vossasjau» på søndag. Då skal alt som blei skylt på land på Voss under flaumen denne veka, ryddast vekk.

Teknisk etat ved Voss kommune har allereie jobba med ryddearbeid i fleire dagar, men mykje arbeid gjenstår enno.

Fleire har meldt seg

— Det er mange stader ein ikkje kjem til med hjullastar. Difor har me tenkt å samle saman så mykje folk me kan, og begynne systematisk rydding, sier Bodil Reime Sørlie, frivillig i Voss Røde kors.

Ho er ein av dei som organiserer ryddesjauen på søndag.

— Voss kommune blei kontakta av fleire som ville hjelpe etter flaumen, men dei har ikkje hatt kapasitet til å organisere noko. Difor spurte dei om me ville hjelpe, seier Sørlie.

— Tre og buskar overalt

Røde kors har no utarbeidd kart delt inn i ulike teigar, slik at ryddinga skal skje systematisk. Dei har fått mykje støtte frå bedrifter i lokalsamfunnet, som har lånt vekk ATVar, donert pengar og lova mat til dei som møter opp.

— Det er eit omfattande arbeid som ligg framfor oss. Mange har allereie rydda ein del, men det ligg tre og buskar over heile Prestegardsmoen. Langs heile strandlinja frå der elva renn ut til campingen, må det og ryddast. Tre, buskar og greiner er blitt rive med av elva, og er så blitt skylt inn på land, fortel Sørlie.

Verste på 200 år

Flaumen på Voss var den verste på over 200 år, og ramma bygda hardt.

Fleire bygningar fekk vasskader, mellom anna trengde det vatn inn i kjellaren på Voss kulturhus. Fleire bustadhus og butikkar på Evanger fekk også vasskader. I løpet av veka steig vasstanden i Vangsvatnet med over fem og ein halv meter.

Ordførar Hans Erik Ringkjøb (Ap) karakteriserte situasjonen som ei naturkatastrofe dagen etter flaumen.

— Flaumen blei mykje verre enn me forventa, sa han til BT onsdag 29. oktober.

LES OGSÅ: