• Eg hadde hjartebank heile dagen, og trudde eg skulle dette saman, seier 79-åringen.

— Dei har teke rubbel og bit, alt av verdi er vekke. Dei har til og med stole gifteringane til mine besteforeldre. Eg er heilt oppgitt, seier ein frustrert Knut Holme Sulen (51), son til Ruth.

Då han kom heim att etter å ha vore vekke frå bustaden i Kjøkkelvik i helga, fekk han seg ei ubehageleg overrasking: Heile mora sin samling av gull, sølv, diamantar, smykke, gifteringar og ur, var vekke.

Ifølgje sonen er det snakk om verdiar på over hundre tusen kroner.

— Eg er sint og fortvila. Det er trist at nokon bryt seg inn i eit hus og stel frå ei snart 80 år gammal dame, seier Holme Sulen.

- Enorm affeksjonsverdi

Verdisakene går tilbake fleire generasjonar, til besteforeldra til 79-åringen.

— Gjenstandane har ein stor historisk verdi, og er samla opp gjennom eit langt liv. Mange av verdisakene har ein enorm affeksjonsverdi for mor. Dette er minner frå min far og mine besteforeldre, seier sonen.

79-åringen sjølv reagerer kraftig på innbrotet.

Dette har gått inn på meg både fysisk og psykisk. Ruth Holme Sulen (79)

— Det er heilt forferdeleg. Alt låg strødd ut over senga då vi kom heim att, og skuffer og skap over alt var endevenda, fortel Ruth Holme Sulen (79), som seier ho føler seg utrygg i huset.

— I natt sov eg ikkje meir enn to minutt. Eg er livredd for å bu her, og har lyst til å flytte.

- Trudde eg skulle dette saman

Sonen er alvorleg redd for at innbrotet har gått ut over mora si helse.

— Eg hadde hjartebank heile dagen, og eg trudde eg skulle dette heilt saman. Dette har gått inn på meg både fysisk og psykisk, seier 79-åringen.

Blant dei stolne gjenstandane er eit russisk gullur av typen Pavel Bure. Uret, som skal vere laga etter ordre frå den russiske tsaren, er svært verdifullt.

— Uret er heilt uerstatteleg. Eg kan berre spekulere i kva verdiane er, seier 51-åringen.

Såg mistenkjeleg bil

79-åringen oppdaga tidlegare ein mistenkjeleg bil ved huset.

— Eg såg ein svart bil som stod ved oppkøyrsla, og bad Knut om å sjå kven det var. Då han gjekk ned for å sjekke, var bilen vekk, seier Ruth Holme Sulen, som trur det var innbrotstjuvane som spana på huset.

No vurderer sonen å utlove ein massiv dusør til den som finn verdisakene.

— Vi vil ta i bruk heile nettverket vårt for å prøve å få verdisakene tilbake. Vi set stor pris på om nokon ser noko som kan hjelpe oss, seier han.

Etterforskinga kan stoppast

Politiet var måndag føremiddag på åstaden og tok DNA-undersøkingar og gjennomførte ei åstadsundersøking.

Men med mindre det kjem inn meir informasjon i saka, kjem ikkje politiet til å halde fram etterforskinga.

— Hadde dette vore noko vi kunne følgje vidare, hadde vi gjort det, men det er det ikkje så langt. Vi ventar på svar på DNA-undersøkinga, seier opplyser politiførstebetjent Kjersti Opdahl i Bergen Vest politistasjon.

Ifølgje Opdahl er grove tjuveri på bustader meir utbredt i ferieperiodar.

— Det ofte slik at tjuvane kartlegg om husa står tomme over lengre tid, seier ho.

- Kva kan ein gjere for å unngå å bli fråstole verdisaker frå eigen bustad?

— Det kan vere lurt å informere næraste nabo før ein er vekke over lengre periodar. Set på ei lampe, og ikkje dekk for gardinene. I tillegg bør ein ikkje la det hope seg opp masse post, seier Opdahl.

— Har du store verdisaker heime, bør du oppbevare dei på sikre stader, seier politiførstebetjenten.

SLO INN DØR: Det var denne døra innbrotstjuvane kom seg inn gjennom. Døra var låst, men blei brote opp av tjuvane.
Vegar Valde