Øvrebø var einaste vitne til at syklisten køyrde av vegen i ein sving på veg ned frå Fanafjellet, i retning Fana kyrkje. Ulykka skjedde under turrittet Os rundt ca. klokka 10.50. I går kveld vart mannen behandla ved Haukeland Sjukehus, Intensivavdelinga. I ei pressemelding frå sjukehuset heiter det at den skadde har kvestelsar og at tilstanden er alvorleg.

— Vi var fire mann som kom samtidig til topps på Fanafjellet. To køyrde først utfor og fekk ikkje med seg det som skjedde då nummer tre køyrde ut, seier Øvrebø til BT. Han kom som nummer fire og var vitne til at medsyklisten, ein 42 år gammal mann frå Fusa, køyrde av vegen og trefte ein telefonstolpe.

— Eg veit ikkje kva årsaka var, men det var framleis litt vått i vegen. Eg fekk sjølv sleng på bakhjulet då eg skulle stogga, seier Øvrebø.

Livlaus utan pust

Då Øvrebø kom bort til ulykkessyklisten til låg han livlaus utan å pusta.

— Eg løfta fram kjeven for å opna luftvegane, og då byrja han å pusta att. Til alt hell hadde eg også med mobiltelefon, og fekk varsla ulykka straks, seier Øvrebø.

Den skadde låg nede i grøfta, og sykkelen var hamna langt frå vegen.

— Det var eit hell at eg kom bak og såg kva som skjedde. Den skadde låg slik til at han kunne risikert å ikkje bli oppdaga, seier Øvrebø, som fekk stogga fleire syklistar.

— Det kom ein som hadde køyrt ambulanse, og han heldt fram med førstehjelp. Andre dirigerte trafikken og fekk vinka syklistar som kom vidare, slik at det ikkje hopa seg opp med folk, seier Øvrebø. Ambulansen kom etter om lag 20 minutt.

Ein vekkar

— Dette var ein vekkar som viser kor viktig det er å kunna førstehjelp. Sykkelklubbane burde med jamne mellomrom halda kurs i dette, seier Øvrebø. Sjølv har han vore med på eit kurs med Luftambulansen, og som medlem der får han Luftambulansens blad der det står mykje om temaet. Det kom godt med i går.

— At slikt skjer er eit kraftig skår i gleda, seier leiaren i CK Henie, Rune Søreide. Han fortel at ulykkessyklisten har stilt til start i Os rundt fleire gongar tidlegare, og kjenner løypa godt.

— Vi ber folk ta det med ro ned Fanafjellet, og har godt med vakter som stoggar biltrafikken oppover når syklistane kjem ned, seier Søreide.

I går deltok 153 syklistar i rittet, og det er ny deltakarrekord. Det var 26. gong det 40-kilometer lange rittet vart skipa til.

— Vi har ikkje hatt ulykker av dette slaget før, seier Søreide.

Rune Nielsen
Amundsen, Paul S.