Politiet i Førde fekk klokka 00.27 i natt melding om ein sakna person.

Ein 17 år gammal utanlandsk person hadde gått seg vill i fjellet og klarte ikkje å koma ned i mørket.

— Han var aleine i fjellet, men var heile tida i telefonisk kontakt med redningsmannskapa, seier operasjonsleia Leif Bell i Sogn og Fjordane politidistrikt til bt.no

Luftambulansen klarte klokka 02.30 å lokalisera guten ved Hornnesstølen i Førde, men klarte ikkje å lande på grunn av det bratte og ulendte terrenget. Sea King redningshelikopter overtok difor oppdraget, melder politiet.

To personar frå Førde Raude kross gjekk til fots opp til stølen for å hjelpa personen ned frå fjellet.

Klokka 03.30 i natt klarte ein ved hjelp av eit Sea King redningshelikopter å få henta 17-åringen ned frå Hornnesstølen.

Folka frå Raude kross snudde då 17-åringen vart henta med helikopteret.

Etter det bt.no forstår skal 17-åringen vera i god form etter fjellturen.