Politiet fekk melding om uhellet klokka 15.10. Ein flåte med sju personar om bord velta, og fire av dei vart meldt sakna. Etter eit kvarters tid viste det seg at alle var komne i land.

— Det var ein flåte med fem gjester og ei guide som velta og alle mann for uti. Ein anna flåte plukka opp ein symjar som for nedover i elva, medan dei andre kom seg i land. Ei stund visste vi ikkje om alle var ok, så difor ringde vi 113. Det er rutine, seier dagleg leiar Erik Stenset i Jølster Rafting.

Stenset seier ingen vart skadd, men vedgår at det var litt dramatisk før dei fekk oversikta over alle.

— Så vi tok ein prat etterpå, seier han.

— Korleis er elva der flåten velta?

– Det er eit ganske greitt parti, men det er klart at det er mogleg å velte der. Men det skjer ekstremt sjeldan.

Dei seks passasjerane om bord i flåten var alle norske.