For eit halvår sidan var dei i trøbbel for flaskefusk i Bergen.

Det har ikkje akkurat flaska seg no heller, om politiets teoriar held vatn. I 14-tida måndag ettermiddag blei ein mann og ei kvinne (begge 45) frå Moldova tatt på nytt.

Ved Rema 1000 i Fjøsangerveien reagerte butikkpersonalet på at dei to prøvde å pante flasker som tydeleg hadde vore samanklemt.

Oppblåsbare flasker

Personalet mistenkte at flaskene var tomgods som alt hadde blitt panta, og deretter klemt saman i panteautomaten.

Å blåse opp igjen flasker og boksar er visstnok ein kjent teknikk frå andre saker.

— Sannsynligvis har dei vore på ein eller fleire plassar og stole flasker som alt var panta, seier politiadvokat Line Skjengen i Hordaland politidistrikt.

Då dei to blei pågripne av politiet, var varebilen dei køyrde full av samanpressa tomgods.

Politiet skal ransake adressa der dei to skal ha tilhald.

1 blei 2,50

I september i fjor blei mannen, kvinna og to andre varetektsfengsla og sikta for bedrageri.

Den gong blei dei tatt med flasker der ein ny strekkode hadde blitt klistra over den eksisterande. Dermed fekk dei 2,50 pr. flaske i staden for ei krone, etter panting ved Øyrane Torg i Arna og fleire andre butikkar.

Dei to kvinnene og to mennene hadde flaks: Fordi politiarresten var full, slapp alle fire fri etter nokre dagar.

— Vi tek til etterretning at dei vart lauslatt sist. Men dette dreiar seg om eit nytt forhold, seier Skjengen.

Nekta avhøyr

Mannen vart avhøyrt måndag. Kvinna har nekta å la seg avhøyre utan forsvarar til stades, noko som skjer tysdag.

— Spørsmålet om vi skal be om fengsling, vil bli vurdert då, seier politiadvokaten.