— Utsikta er fantastisk! Kor finn du hotellrom som dette? seier Edward og slår ut med armane.

Både gitaren og steinbenken, der 58-åringen har tilbrakt fire romjulsnetter, er dekte av eit tynt lagt rimfrost.

Natt til onsdag sov Edward under open himmel i åtte kuldegrader, godt innpakka i soveposen.

— I Oslo var det kaldt. Der slo eg opp teltet. But it's not that cold here.

— Men held du deg varm om natta?

— Varm nok, er svaret.

Ventar på ein hit

Det er ikkje lidenskap for frisk luft som får Edward - han kallar seg berre det - til å sove ute om vinteren. Den omreisande gatemusikaren ventar på ein hitlåt, eit kommersielt gjennombrot. Målet er å gje ut sine eigne songar på cd.

— Eg har ein hit. Den er berre ikkje spelt inn enno, seier Edward, som opprinneleg kjem frå staten Virginia.

Inntil vidare spelar han andre sine hitlåtar. Fire månader i året reiser Edward på loffen med gitaren og det han kallar «turistmusikk» - Dylan, Doors, Beatles. I over fire år har han reist rundt i Europa og besøkt til saman 24 land og 50 byar.

— Eg har vore overalt, sett Europa frå gateplan og lært mykje. Praha er den vakraste byen, Noreg det vakraste landet, seier Edward.

Men folk legg altså ikkje att nok myntar til at ein stakkars musikant kan ta seg råd til å sove innandørs i romjula.

Julestengt by

Edward var i Oslo første gong for fire år sidan, og bestemte seg for å kome tilbake i den kalde årstida og oppleve vinteren. Men etter fem veker i ein hovudstad som berre vart kaldare og kaldare, bestemte Edward seg for å dra til varmare strøk. Valet fall på Bergen, der amerikanaren fekk romjulssjokk.

— Eg ante jo ikkje at byen stengjer i ei veke i jula!

Edward undrar seg også over at han søv aleine under den stjerneklare julehimmelen over Nordnesparken.

— Så vakkert som det er her, trudde eg at langt fleire ville sove ute. Men ingen tenkjer på det, ingen gjer det! Det overraskar meg.