LENA VERMEDAL

Tolvåringen var helt for ein dag og heilt omsverma av klassekameratar ved Våge skule på Bømlo i går.

Med blomebukett og heidersdiplom frå Norges Livredningsselskap i neven, kunne han sola seg i glansen frå medelevane.

— Eg synest han var veldig modig, seier Espen Sæbø Nilssen (11).

— Eg hadde ikkje tort det, legg Jens Erik Bauge Løkling til.

- Ho var veldig tung

Søndag 22. august var Skipavikjo fylt med barnefamiliar på aktivitetsdag. Nokre barn bada og slengde seg i sjøen frå eit tau med krok.

Femåringen Karoline Nesheim stod og såg på - kledd i regnkle og støvlar - men utan redningsvest.

Så skjedde all ting veldig fort.

— Ei anna jente hadde nettopp slengt seg. Eg såg femåringen tok etter kroken, men han var så tung at ho blei drege uti. Då hoppa eg for eg skjønte det ville gå galt, fortel Lars Sakseide.

Han rakk ikkje tenkja eller ropa på hjelp. Dukka berre ned til botn og henta jenta opp frå sjøen.

— Eg spente ifrå og fekk heldt jenta oppe. Ho var så tung med regnkle og støvlar. Eg svelgde ein del vatn for eg fekk berre pusta ein gong, seier tolvåringen som sjølv berre er 1,50 meter høg.

Enno har han eit kutt i foten etter redningsdåden.

- Klok og modig

Hans Terwindt frå Bergen krins av Norges Livredningsforbund veit berre om fem andre barn på Lars sin alder som har gjort liknande redningsdåd. Han er imponert.

— Dette heidersbeviset blir ikkje delt ut sånn utan vidare. Lars redda Karoline frå ein sikker drukningsdød.

— Først var han klok og såg at dette kunne gå gale. Så var han modig og dykka ned i sjøen. Det kunne vore veldig farleg, sa Terwindt til elevane som var samla i gymsalen under utdeling av diplomet.

Mor til redningsmannen er overraska over sonen sin.

— Det er berre to år sidan han lærte å symja. Når du tenkjer på kor tungt det var, er det vanskeleg å forstå at han klarte det, seier Aslaug Sakseide.

Jenta som blei redda var ikkje til stades under arrangementet på Våge skule i går.

Mora sendte likevel ei helsing gjennom Bergens Tidende.

— Me vil gjerne gratulera Lars og takka han for hjelpa, seier Trine Nesheim.

HELT FOR EIN DAG: For ein månad sidan redda Lars Sakseide (12) ei fem år gammal jente frå drukningsdøden. I går var han omsverma som ei popstjerne. Alle ville ha ein bit av redningsmannen som fekk Norges Livredningsselskap sitt heidersdiplom for redningsdåden.<br/>Foto: TOMAS ALF LARSEN