To kalde netter på rad har sett fruktblomen på prøve. Men Bioforsk i Hardanger trur han vil klara seg.

— Dei toler temperaturar litt under null også. Så for Hardanger sin del reknar eg med dette går bra. Her er fjorden med på å jamna ut døgntemperatuen, seier seniorforskar Mekjell Meland ved Bioforsk i Ullensvang.

Natt til i dag blei det ved Landbruksmeteorologisk Tjeneste sin stasjon i Ulvik målt minus 0,7 grader i firetida i natt. I Etne var nattetemperaturen minus 1,8, og minus 1,4 i Ljøsne i Lærdal.

Urolege fruktbønder

Også i Rogaland og Telemark er fruktbøndene urolege for kva kuldeperioden vil få å seia for avlingane til sommaren og hausten. Meteorologane melder om kalde netter i enno nokre døger.

Årets fruktbløming starta tre veker tidlegare enn normalt grunna varmeperioden i april. Det er plomme- og morelltrea som er først ute. Eplebløminga startar seinare, for nokre sortar ikkje før mot slutten av mai.

— Så det er enno håp for dei som vil sjå årets fruktbløming i Hardanger. Men morell- og plommeblomen har alt teke til å falma, det vil seia at han blir brun og fell av, seier Mekjell Meland.

Helikopter mot frost

På Kontinentet og i USA er kuldeperiodar etter tidleg bløming eit velkjent fenomen blant fruktdyrkarar.

I Nederland og Belgia var det målt ned mot minus sju grader ei aprilnatt i år. Det førte til at eit fruktselskap i Belgia eksperimenterte med å nytta helikopter for å få opp temperaturen i eple- og pæreplantasjane. Rotorane frå helikopteret piska opp kald luft frå bakken og fekk ho blanda med varmare luft i høgda, slik at snittemperaturen auka med om lag ein grad. Det er enno ikkje klart kva effekt metoden hadde. I USA er det nytta store varmevifter til samme føremål.