Eit uthus brann heilt ned, og eit naust fekk skader i brannen, som vart meldt litt før kl. 17 fredag. Flammane truga ei stund med å spreie seg til eit bustadhus like ved.

— Eigaren og gode naboar gjorde heilt rett, og konsentrerte seg om å kjøle ned veggen på huset, i staden for å prøve å sløkkje brannen i uthuset, seier vakthavande sjef Ståle Hauge i Lindås og Meland brannvesen.

Fleire vass- og hageslangar vart brukt til å halde nede temperaturen på husveggen, medan dei venta på hjelp frå brannvesenet.

— Det var ei heilt rett prioritering. Vi må berømme dei for innsatsen, seier Hauge.

Klokka 17.15 var brannen sløkt. Ingen kom til skade. Nauset var brukt til å lagre båtar, men desse kom ikkje til skade.

Brannvesenet rykte ut frå to stasjonar, med fire bilar og 14 mann.

Brannen spreidde seg også til terrenget.

— Også dette er nå sløkt, seier Hauge.

Hordaland politidistrikt opplyser på Twitter fredag ettermiddag at brannårsaken førebels er uklar.