EYSTEIN RØSSUM eystein.rossum@bergens-tidende.noEtter fem politiavhøyr av ektemannen (27) står politiet på Sotra fortsatt utan spor etter den 24 år gamle kvinna, nesten eit år etter at ho forsvann. Det einaste dei veit er at ho kom til Noreg 18. februar i fjor frå ein flyktningleir i Etiopia for å bli gjenforeint med den somaliske ektemannen, som bur på Sotra.Etter berre to dagar på Sotra skal ektemannen tatt med seg kona til Oslo og forlatt henne åleine på sentralbanestasjonen med ein stor, beige koffert. Ingen andre vitne Sidan har han ikkje sett noko til kona, har han forklart til politiet. Årsaken til Oslo-reisa var ifølgje ektemannen at Samira var gravid med ein annan mann, og at han difor ikkje ville ha meir med henne å gjere.Politiet har ingen andre vitne som kan stadfeste det somaliaren har fortalt. Dei har ingen identifikasjonspapir på kvinna, utover eit svart-kvitt foto. Dei kjenner ikkje fødselsdatoen hennar, og har heller ikkje fingeravtrykket. Kvinna skal berre snakke somalisk.Hos politiet vart forsvinninga først ei sak då ektemannen møtte opp på Fjell og Sund lensmannskontor og fortalde at han ikkje lenger budde saman med kvinna, og at han ikkje visste kvar ho var. Ekteparet var då innkalla for å hente eit førebels norsk pass som låg og venta på kvinna. Utan reisedokument Ektemannen har ifølgje politiinspektør Harry Rosnes i Hordaland politidistrikt gitt til dels motstridande opplysingar i dei fem vitneavhøyra.— Vi vil difor svært gjerne ha kontakt med personar som kan ha sett kvinna eller som veit noko om henne, seier Rosnes.Ifølgje lensmannsførstebetjent Torstein Skeie ved Fjell og Sund lensmannskontor hadde Samira ikkje pass eller andre reisedokument til å forlate Noreg. Ho er heller ikkje registrert på norske sjukehus eller helsestasjonar. - Dersom ho har reist frå landet, må det ha skjedd illegalt, seier Skeie. Ektemannen har til politiet sagt at ho kanskje har reist til Nederland, og ho vil no bli etterlyst via nederlandsk politi.Ifølgje ektemannen skal Samira Hassan Sheika Ali vere mellom 165 og 168 cm høg, ha langt svart hår og vanleg kroppsbygnad. Då ho forsvann bar ho ei grøn vinterjakke med pelskrage, raud somalisk kjole og svarte sko.

KVAR ER HO? Har nokon sett denne kvinna? Ho er mellom 165 og 168 cm høg, har svart hår og vanleg kroppsbygnad.